Gipahibalo sa Provincial Disaster Risk Reduction and Management Office (PDRRMO) nga gi-elevate na ngadto sa Blue Alert status ang Emergency Operations Center sa Davao del Norte mga alas-12 sa kaudtohon niadtong Enero 15, 2025, tungod sa walay hunong nga pag-ulan resulta sa easterlies ug sa kasamtangang weak La Niña season.
Sumala ni Eric Rosilio, Division Head sa Operations and Warning Division, as of 5:00PM Enero 15, nakasinati na ang pipila ka lugar og light to moderate nga pagbaha, ilabi na sa Saug River nga anaa na sa ikaduhang alerto. Ang Liboganon River nagpabilin pa sa unang alerto, apan padayon gihapon ang pag-monitor niini sanglit padayon usab ang kusog nga pag-ulan ganihang buntag sa upstream nga mga lugar sama sa Bukidnon ug Talaingod.
“Sa kasamtangan, ang probinsya sa Davao del Norte naka-experience sa weather system nga easterlies. Mao kini ang igang, humid, ug dry nga hangin nga naggikan sa Western Pacific Ocean. Gumikan sa pagka-dry niya, naa tay proseso nga water evaporation. Sa karon, naa pud tay onset sa La Niña nga bisan pa easterlies lang atong hangin, pero gumikan kay La Niña season ta karon, so mas daghang tubig ang dala sa mga pag-ulan,” ingon ni Rosillo.
Sulti ni Rosillo nga ang probinsyal nga panggamhanan, ubos sa direktiba ni Governor Edwin I. Jubahib nga unahon ang kaluwasan, andam na ang mga gamit sa rescue ug ang mga response team nga naka-standby. Gihangyo usab niya ang mga residente sa mga bahaonon ug landslide-prone nga lugar nga dili magduha-duha sa pagbakwit kung adunay warning.
“Upon the guidance ni Kuya Gov man gud ni atong gina-follow always being proactive always. Ug kanunay nagaingon si Kuya Gov nga dapat nga walay mamatay. So, part atong being proactive atong gi-elevate ang status sa atong Emergency Operation Center into Blue Alert status. Pasabot niana, kaming tanan diri sa opisina sa PDRRMO on standby, ready to be deployed anytime, anywhere, diri sa atong probinsya. Ang atong mga rescue equipment, ang atong mga gamit andam. Ug ato pung mga other members sa response clusters nato within sa capitol offices, ato pud silang giinform. Pero on standby status pa ta,” dugang ni Rosillo.
Gilauman nga mag-anam ka maayo ang panahon sa sunod adlaw, diin walay dagkong weather systems o kusog nga pag-ulan ang makita. Apan padayon ang pag-monitor sa mga suba ug delikadong mga lugar aron masiguro ang kaluwasan sa tanang komunidad sa probinsya.
Writer: Jun Rey Villanueva
