Gidayeg sa Probinsya sa Davao del Sur ang implementasyon sa Davao del Norte sa ilang mga programa ilawom sa Provincial Anti-Drug Abuse Council (PADAC). Atol kini sa ilang pagbisita sa probinsya alang sa "Interface and Benchmarking Activity" nga naglakip sa PADAC-LAPDA Implementations, Provincial Drug-Free Workplace Program, Drug Testing Laboratory, Balay Silangan, Luntiang Paraiso Rehab Center, ug K9 Dogs Facility sa probinsya.

Sumala ni PADAC-Focal, Action Officer Francisco Ray Banlasan, dugay na nilang giplano ang pagbisita sa Davao del Norte aron makuha ang mga maayong pamaagi sa pagdumala sa anti-illegal drugs.

"With all the provinces nga akong nakita, ang Davao del Norte ang akong unahon sa pagtan-aw ug pag-follow sa good practices about anti-illegal drugs, especially sa pagdumala sa atoang Governor Jubahib nga nakita nako nga productive kaayo unya naghatag og mga good examples nga dapat tularan sa ubang probinsya ang pagpadagan sa anti-illegal drugs," matud ni Banlasan.

Dugang ni Banlasan, apil sa ilang plano ang pagsundog sa pagdumala sa anti-illegal drug program sa Davao del Norte,"Amoang goal nga maparehas ang pagdumala sa anti-illegal drug program dinhi nga province, maong dinhi gayud mi naabot... Ug gi-schedule amoang benchmarking."

Ang Davao del Sur naglaraw usab nga mabuhat ang susamang nindot ug han-ay nga mga programa nga nakita nila sa Davao del Norte pinaagi sa pag-evaluate sa ilang kakulangon ug sa pag-adopt sa mga best practices nga ilang natun-an.

Ang miatiman sa delegasyon sa Davao del Sur naglakip sa mga PG-Department Heads nga sila Edwin C. Palero, Rosalinda O. Rapista, ug Dr. Alfredo A. Lacerona, Assistant Department Head Jeffrey Calamungay, Dr. Kristine Nicole P. Hortel, ug Dr. Josephine Parreñas gikan sa Provincial Health Office, ug ang mga draftsman sa K9 Doghouse nga sila Royce Lorica ug Steven Dolorito.

Writer: Caren De Vera