Sa pagtak-op sa ika-35 nga National Statistics Month (NSM), ang Philippine Statistical Authority – Provincial Statistical Office (PSO) Davao del Norte nagpahigayon og closing program sa Bulwagan ng Karunungan, Capitol Compound, Tagum City, niadtong Oktubre 30, 2024.
Gipasidunggan sa programa ang mga private stakeholders, government line agencies, ug mga departamento sa kapitolyo nga hugtanong nisuporta sa ilang kalihokan. Gipanghatagan og plaque ug tokens ang mga nidaog sa nagkalain-laing kontes sa NSM sama sa photography, reel-making, poster/slogan-making, infographic-making, ug provincial elimination quiz.
Sa infographic-making contest, si Zhyny Gecera sa Tagum National Trade School ang nidaog, samtang sa poster/slogan-making contest, si Kendrick Ivan Aguinaldo gikan sa Patel Elementary School sa Gupitan, Kapalong ang nakasungkit sa titulo.
Matud ni PSA Davao del Norte Chief Statistical Specialist Pepito Amoyen, nga ang mga madaog sa Provincial Statistics Fest mahimong representante sa probinsya sa regional level competition.
"This is also the time I think nga maghatag ‘mi og award kadtong kinsay midaog sa among Provincial Statistics Fest, kay kanang atong winner sa Provincial Statistics Fest mao na sila ang representative sa Davao del Norte ngadto sa Regional PSQ. Then, kung palaron ang atong taga-probinsya maoy finalist sa national,” sulti ni Amoyen.
Nagpahayag usab si Amoyen nga importante ang kooperasyon sa katawhan sa pagkolekta sa datus para sa kalamboan sa probinsya ug nasud. Iyang gibutyag ang pipila ka kalisdanan nga giatubang sa mga enumerators.
"Isa sa mga problema sa data collection, kanang dili entertain-on ang atoang mga enumerators. Then, bisan unsa namo’g pagpasabot nga importante kaayo ang datus nga ilang ikahatag para sa atoa sa nasyonal, kay see for example population man gud, isa na siya nga gibasehan sa atoang national tax collection," dugang ni Amoyen.
Sa matag tuig nga pag-obserba sa NSM, naghatag kini og dakong importansya sa statistics ug mga datus sa pagplano ug paghimo’g desisyon sa gobyerno. Padayon ang PSA-PSO sa ilang paningkamot nga maedukar ang katawhan ug mga organisasyon kabahin sa mahinungdanong papel sa statistics sa matag sektor sa komunidad.
Writer: Lorna Tripoli
