Giaprobahan sa Provincial Anti-Drug Abuse Council (PADAC) ang Local Anti-Drug Plan of Action (LADPA) alang sa tuig 2026 hangtod 2028 atol sa ilang 2nd Quarter Regular Meeting niadtong Hunyo 11, sa Bulwagan ng Karunungan, Provincial Government Center, Mankilam, Tagum City.
Ang LADPA magsilbing giya ug sumbanan sa padayon nga kampanya sa Davao del Norte batok ilegal nga droga, nga naglangkob sa estratehiya sa preventive education, law enforcement, rehabilitasyon, ug reintegrasyon sa mga apektadong indibidwal.
Si PLtCol Frederick E. Deles, hepe sa Provincial Operation Management Unit, maoy nangulo sa miting isip representante ni PADAC Chairman Governor Edwin I. Jubahib, kauban si PADAC focal person Jucelyn Lumangtad ug Provincial Prosecutor Norman Solis. Nitambong usab ang mga representante gikan sa Luntiang Paraiso Regional Rehabilitation Center, 11 ka Municipal ug City Anti-Drug Abuse Councils (MADACs/CADACs), Davao del Norte Police Provincial Office (DNPPO), Philippine Drug Enforcement Agency (PDEA), ug uban pang ahensya sa gobyerno.
Sa maong tigom, gitaho sa DNPPO nga adunay 175 ang naarestong indibidwal nga nalambigit sa pagpayuhot sa ilegal nga droga. Nasakmit sa awtoridad ang 51.402 nga gramo sa marijuana ug 1,060.12 gramo sa shabu nga mibalor og kapin siyete milyones ka pesos (P7M) gikan bulan sa Abril hangtod Hunyo 9 niining tuiga.
Gipresentar usab sa Department of Education ang ilang mga inisyatibo sa Brigada Eskwela ug kaandam sa klase, samtang ang Anti-Drug Abuse Councils sa Island Garden City of Samal ug Panabo City nipakita sa ilang kampanya pinaagi sa city-wide symposiums ug barangay-level drug testing.
Gihisgutan usab ang pagpangandam alang sa umaabot nga ika-10 nga anibersaryo sa tanang ADACs sa probinsya nga ipahigayon sunod tuig.
Writer: Lorna Tripoli
