Gipahigayon sa Luntiang Paraiso Regional Rehabilitation Center (LPRRC) nga nahimutang sa Poblacion, New Corella ang ilang ika-24 nga Anibersaryo sa Pagtukod, niadtong Disyembre 3, 2024.
Si Provincial Health Officer Dr. Alfredo Lacerona, mipadayag sa iyang pasalamat kang Gobernador Edwin "Kuya Gov" Jubahib tungod sa iyang walay puas nga suporta alang sa rehabilitation center. Sa iyang mensahe, gibutyag ni Dr. Lacerona ang dedikasyon sa probinsyal nga panggamhanan sa paghatag og ikaduhang higayon alang sa mga indibidwal nga nagtinguha nga magbag-o sa ilang kinabuhi.
“Dako kaayo ang akong kalipay nga nakaabot pa ta for 24 years in existence ang atoang rehabilitation center. Hapit na gyud nawala ang atoang Luntiang Paraiso, hapit unta wala namo diri karon kay lagi it is not easy to operate ang isa ka facility. Mao nang pasalamat pud ko sa atoang administration karon kay Kuya Gov Edwin I. Jubahib nga iyang gidawat ang challenge nga ipadayon ang pag-operate ani nga facility,” sumala ni Dr. Lacerona.
Si Philippine Drug Enforcement Agency (PDEA) Provincial Officer Investigation Agent V Mildred Driz-Romero mipaambit sa iyang mensahe nga nagdasig sa mga residente nga magpadayon sa ilang panaw ngadto sa pagbag-o.
“Matag usa kanato naay mga naagian, naay mga problema, naay mga naagian nga mga kasakit, kalipay, naay mga panghitabo nga wala gyud nato mapugngan. Naay mga panghitabo nga wala nato makontrol ang atong kaugalingon. Apan magpasalamat ta kay wala ta didto sa laing lugar. Nia ta dinhi sa usa ka paraiso nga moagak kanatong tanan,” matud ni Romero.
Mipadangat sab si Department of Health (DOH) Regional Director Dr. Anabelle Yumang, sa iyang mensahe pinaagi sa audio-visual presentation nga nagpadayag sa iyang suporta, diin iyang gipasiugda ang kaimportante sa kooperasyon aron mapadayon ang mga programa nga nagatubag sa problema sa drug addiction.
Mipaambit sa iyang maayong kasinatian samtang anaa sulod sa pasilidad si Kuya Jhon, dili niya tinuod pangalan. Matud niya nga dako kaayo ang nahimong kausaban sa iyang kinabuhi samtang gipailawom sa rehabilitasyon. Gipasalamatan sab niya ang maayong pagtagad ug pag-amoma sa mga personahe dili lamang kaniya kondili sa ilahang tanan nga anaa nangita og kaayohan sa ilang kaugalingon.
“Trust me kung naa kay acceptance sa imong kaugalingon pagsulod nimo diri, diri nimo madawat nga adik dyud ka. Adik gyud ta kay naa naman ta diri. Kay kung dili ta adik katong curiosity nga kaisa lang dili na nato to usban. Kaning atong bisyo, dili ko proud ani for how many years. Sama sa ginaingon ni ma’am nga swerte ta kay naa ta diri nga buhi ta,” sulti ni Kuya Jhon.
Atol sa maong kalihokan, gihatagan sab og pasidungog ang mga personahe sa pasilidad nga nagpakita sa ilahang dedikasyon ug talagsaong katakos sa pagtuman sa ilahang mandato nga maghatud sa pinakamaayong serbisyo ngadto sa ilahang mga pasyente.
Writer: Nestor Mata, Jr.
