Sa pagpakusog sa iyang flagship KAAGAPAY Program, target ni Kuya Gov Edwin “Kuya Gov” Jubahib nga triplihon ang ani sa humay sa probinsya gikan sa 4.8 tonelada ngadto sa 12 ka tonelada matag ektarya.
“Sa humay, high breed seeds na ang atong gamiton…. Target nato karon nga ang rice farmers sa Davao del Norte mo-harvest og 12,000 kilos per hectare,” butyag sa gobernador, atol sa June Convocation Program sa Kapitolyo.
Sulti ni Kuya Gov nga kaya kaayo ni kab-oton sa probinsya sanglit dili na mahimong babag ang Sangguniang Panlalawigan sa iyang mga plano, lakip na ang iyang tumong nga doblehon ang pondo alang sa paglambo sa programang agrikultura sa probinsya.
“Karon kay gihatag man sa Ginoo ang atong gipangayo nga ang Sangguniang Panlalawigan dili (na) maoy mahimong babag sa tanan natong gustong kaayohan sa katawhan… Himuon nato nga ang budget nato for agriculture and livestock atong doblehon,” dugang sa gobernador.
Dungan sa iyang prayoridad nga pagtaas sa produksyon ang “value-adding” sa mga produktong agrikultura aron modako ang kita sa mga mag-uuma ug molambo ang ilang kahimtang sa kinabuhi, ug aron malikayan ang pag-usik-usik ug masiguro ang kalidad sa mga produkto.
Pasabot sa “value-added products” ang paghatag sa mas taas nga bili sa produkto pinaagi sa packaging, processing, or branding, sama pananglitan sa mais nga himuong tortillas, corn grits, corn syrup, cornstarch, corn flakes, ug uban pa, nga mas taas na ang “market value” niini.
Butyag sa gobernador nga magpatukod siya og mga processing center sa mga agricultural products sa probinsya, aron mahimo nang dungan nga mo-export ang probinsya sa mga produktong agrikultura ug mga processed products niini.
Mopatukod sab si Kuya Gov sa research laboratory para sa livestocks alang sa quality control, research, ug paglikay sa sakit, aron himsog ang mga kahayopan ug mousbaw ang produksyon.
“Himoon nato ang province of Davao del Norte as a model, nga dili na ta importer kundili kita ang exporter sa agricultural products,” sulti ni Kuya Gov.
Writer: Noel Baguio
