Pormal nga mipirma sa Memorandum of Agreement (MOA) ang 14 ka benepisyaryo sa Davao del Norte Learning Institute (DNLI) – Provincial Scholarship Program uban sa Probinsyal nga Panggamhanan sa DavNor ug sa partner niini nga kolehiyo ang Davao del Norte State College. Gipahigayon kini sa Bulwagan ng Karunungan, Provincial Capitol, Mankilam, Tagum City, Agosto 11.

Pirmado usab kini ni Gobernador Edwin I. Jubahib isip executive official sa probinsya. Kini ang ikaduhang hugna sa paglagda sa MOA, human sa unang seremonya kaniadtong Hulyo 23 diin siyam (9) ka iskolars ang unang nipirma. Subay sa scholarship program, 75% sa binulan nga bayad libre para sa mga empleyado sa provincial capitol, samtang 37.5% libre alang sa mga aplikante nga gikan sa ubang ahensya.

Matod ni Dr. Mervin Jay Suaybaguio, ang DNLI Executive Director ug DavNor Provincial Information Officer, nga sa 30 ka slot nga giandam, 23 ang nakapasar sa hugot nga screening, nga naglakip sa examination ug interview, uban sa pakigtambayayong sa DNSC. Gipasabot ni Suaybaguio nga ang tabang nga gihatag sa probinsya maoy puhunan nila sa personal nga paglambo ug dugang kahibalo aron  magamit nila sa opisina ug komunidad.

“You might be wondering unsa pud ang return of investment sa Provincial Government. Of course, ang inyong contribution sa inyong opisina, community, sa inyong mga pamilya, ug inyoha pung growth... Gipartner gyud namo ang Davao del Norte State College. Aside sa dili ingon ana kamahal ang tuition, but they have a very good or kana bitawng excellent nga academic reputation especially sa ilang mga masters program,” sulti ni Suaybaguio.

Writer: Lorna Tripoli
Photos: Nelson Montero, Davao del Norte Learning Institute