Sa ikatulong higayon, nakadawat og dugang nga suporta ang mga miyembro sa Katipunan Fisherfolks Association pinaagi sa KAAGAPAY Program (Kawsa sa Agrikultura ug Panginabuhian sa Barangay), nga gipasiugdahan ni Governor Edwin I. Jubahib. Gawas sa tilapya, gihatagan na usab sila og semilya sa hito, nga nakapalapad sa ilang panginabuhi sa pangisdaan.
Sukad sa 2023, matag benepisyaryo nakadawat og 3,000 ka fingerlings sa tilapya, ug karon, gihatagan pa sila og dugang nga benepisyo aron mapalambu ang ilang kita. Ang programa, nga gisugdan atol sa pandemya niadtong 2020, nagpadayon sa pagtumong sa pagpalig-on sa kasiguruhan sa pagkaon ug panginabuhian sa mga Dabaonon.
Si Samuel Urdaneta, presidente sa Katipunan Fisherfolks Association, usa sa nakapahimulos sa maong inisyatiba. Matod niya, gikan sa 1,000 ka fingerlings, nakaani siya og 105 kilos nga tilapya sulod sa upat ka bulan, nga nakapadugang sa iyang kita tungod sa libre nga feeds nga gihatag sa programa.
“Dako akong pasalamat sa KAAGAPAY kay nakaangkon kami og dakong tabang alang sa among panginabuhi. Plano nakong palapdan ang akong isdaan aron mahimong breeder sa fingerlings sa tilapya ug hito,” ingon niya.
Usa pa ka benepisyaryo, si Rosemarie Eslaban sa Carmen, nakapalapad na sa iyang umahan gikan sa tunga sa ektarya ngadto sa duha ka ektarya. Nagatanom siya og paliya, batong, pipino, ug upo tungod sa libreng semilya ug abuno nga gihatag sa KAAGAPAY. Matud niya, “Kada semana, mo-income ko og ₱6,000 gikan sa batong, ug usahay moabot sa ₱10,000. Dako kaayo ning tabang sa among pamilya.”
Ang KAAGAPAY Program nagapadayon sa pagpanghatag og ayuda alang sa mga mag-uuma ug mangingisda sa Davao del Norte, usa ka pasalig sa probinsya alang sa kalambuan sa lokal nga agrikultura ug panginabuhian.
Writer: Lorna Tripoli
