Nagpunsisok ang mga baryohanon nga nakatagamtam sa libreng serbisyo dalit sa Oplan KKK (Kaagapay sa Kalinaw ug Kalamboan) sa lungsod sa Carmen. Ang mga barangay functionaries usab sa matag baryo sayo nga midawat og pamaskong handog alang sa tuig 2024, kini dalit gikan sa Probinsyal nga Panggamhanan sa Davao del Norte.
Tinguha sa administrasyon ni Governor Edwin "Kuya Gov" Jubahib nga malibot ang tanang LGUs nga mahatdan sa libreng serbisyong panglawas, tambag legal, libreng gupit, bugas, tsinelas, school bag, ug medisina. Nanghatag usab ang maong programa og libreng semilya sa prutas, abono, ug bitamina alang sa mga hayop. Lakip ang pagtunol sa mga insentibong salapi sa mga nagalihok sa mga kabarangayan.
Katambayayong sa gobernador ang mga departamento sa kapitolyo, Davao del Norte Provincial Police Office (DNPPO), kasundalohan, ug uban pang mga government line agencies.
Kantidad og ₱2,000 alang sa mga brgy. tanod , brgy. health workers (BHW) -₱5,000, TB informal laboratory workers - ₱4,000, volunteer brgy. sanitary inspectors - ₱5,000, child development workers - ₱10,000, brgy. nutrition scholar - ₱6,000. Samtang, sa nasampit nga lungsod ang 262 ka mga blood galloner gitunolan og ₱1,000, ug ₱3,000 alang sab sa mga brgy. blood coordinators.
Ang lima ka barangay nga naserbisyohan sa nagpadayong Oplan KKK ug incentive pay-out mao ang Tuganay, Salvacion, San Isidro, Guadalupe, ug Anibongan, Disyembre 5 sa kasamtangang tuig.
Writer: Lorna Tripoli
