Nobenta y dos kilos nga basura ang nakuha sa mga kabataan atol sa gipahigayon nga coastal cleanup sa baybayon sa Barangay Madaum, Tagum City. Kini nga kalihokan gipangunahan sa mga estudyante gikan sa Jose Tuason Jr. Memorial National High School uban sa suporta sa mga Red Cross Volunteers, Provincial Youth and Development Council, ug mga miyembro sa Girls ug Boy Scouts of the Philippines.

Lakip sa mga nakuhang basura mao ang plastic bottles, cellophane, mga tsinelas, ug uban pang mga basura nga nasuksok sa mga punoan sa mangrove trees. Kini nga pagtinabangay sa paghinlo sa dagat nagtinguha nga mapukaw ang kabatan-onan bahin sa importansya sa pagpanalipod sa kinaiyahan.

Si Andrea Colin Amolo, usa sa mga estudyanteng niapil, nag-awhag sa mga kabatan-onan nga batasanon ang paghinlo sa palibot labi na sa mga kabaybayonan.

"Stay mindful, and be a responsible citizen for the future of our community,” matud ni Amolo.

Gawas sa cleanup, nag-organisa usab og tree planting activity diin ang mga Boy Scouts maoy nitanom og mga punoan sa kahoy aron makatabang sa pag-amuma sa kinaiyahan.

Ang maong mga kalihokan gihimo niadtong Oktubre 19, 2024, isip kabahin sa Provincial Youth Congress nga gipasiugdahan sa Probinsyal nga Panggamhanan sa Davao del Norte ubos sa pagdumala ni Governor Edwin I. Jubahib, pinaagi sa Provincial Sports and Youth Development Office ug sa buhatan ni Provincial SK Federation President, Board Member Helen Mae Discaya.

Writer: Lorna Tripoli