Gisaulog ang ERPAT Family Week Celebration sa Robinson’s Place, Tagum City, niadtong Septyembre 20, 2024, uban ang temang “Empowering Dabaonon Fathers and their Families”. Ang kalihokan gihimo pinaagi sa kolaborasyon sa Strong Families Program ug Robinson’s Place Tagum, nga nagtinguha nga mapalig-on ang papel sa mga amahan sa pagpatubo ug pag-atiman sa ilang pamilya.

Si Provincial Social Welfare and Development Office (PSWDO) Assistant Department Head Jeffrey Calamongay ang nanguna sa pag-abiabi sa mga partisipante, ug malipayong miingon nga ang maong kalihokan usa ka maayong higayon alang sa mga amahan aron magtigom ug ipakita ang ilang mga abilidad samtang maglingaw-lingaw uban sa ilang mga pamilya.

“Kini siya nga activity in line sa celebration sa family week. Gihatagan nato og higayon ang mga papa nga magpakita sa ilahang mga talent... Daghan kaayong salamat sa inyong presensiya karon ug paghatag og pagtagad nga mamahimong lig-on ang atoang pamilya. Kay atong hinumdoman nga ang pamilya maoy pundasyon sa komunidad,” matud ni Calamongay.

Nipaambit sa iyang mensahe si Governor Edwin "Kuya Gov" Jubahib nga gibasa sa iyang Private Secretary Gerry Cosal, diin iyang gipasabot ang dakong suporta sa administrasyon alang sa maong kalihokan. Sumala pa niya nga ang mga amahan adunay dakong papel sa pagtukod og pagpalig-on sa ilang pamilya. Dugang niya nga ang maong kalihokan usa ka paagi aron ipaabot ang iyang pagpasalamat sa mga amahan.

“Today, we gather to recognize the efforts of our Dabaonon fathers who are stepping up to become not only providers but also nurturers, mentors and partners in raising resilient and responsible families. The influence of a father is immeasurable and when empowered, they can shape the future of their children, building a society grounded on respect, discipline and love,” sumala ni Cosal.  

Subay sa maong kalihokan nagpahigayon kini’g daghang makalingaw nga mga aktibidad sama sa Zumba Papa, Videoke King, chess, dama, dart, ug mga dula para sa mga kabataan sa Children’s Session and Play. Ang mga partisipante malipayong nag-apil sa matag kompetisyon ug dula, nga nagdala og kalipay ug kadasig dili lang sa mga amahan apan sa tibuok pamilya.

Ang ERPAT Family Week Celebration nagpakita sa dakong pagtagad sa mga amahan ug ang ilang dakong papel sa pagtukod ug pagpalig-on sa malipayon nga pamilya, usa ka importanteng aspeto sa pagpanday sa usa ka mas lig-on ug maayong komunidad.

Writer: Nestor Mata, Jr.