2ND RUNNER-UP sa nasyonal lebel ug modelong pamilya sa Rehiyon XI ug Davao del Norte ang pamilya sa Sto. Tomas sa gihimong Search alang sa Huwarang Pamilyang Pilipino 2017.

Benepisyaryo sa Modified Conditional Cash Transfer-Pantawid Pamilyang Pilipino Program (MCCT-4Ps) program sa gobyerno, gipasidunggan ang pamilya ni Ian Betua ug Alma Grace Betua atol sa gihimong Provincial Parents Education Congress & Awarding Ceremony niadtong Oktubre 6, 2017 didto sa Molave Hotel, Tagum City. 

Nga may lima (5) ka anak, gibahin pag-ayo ni Alma Grace ang iyang panahon diha sa pag-atiman sa pamilya ug boluntaryong serbisyo ngadto sa barangay. Sa mga adlaw’ng Lunes, Myerkoles ug Byernes, human nga nakapanghipos sa balay ug nahatod ang mga bata sa eskwelahan, nagtudlo si Alma ug religion diha sa elementarya ug hayskul. Usa sab siya ka Parent-Leader sa 4Ps nga programa aron maoy manguna sa mga kalihokan sa mga parehas nila nga benepisyaryo. Nga bitbit kanunay ang “manicuring set,” dili molabay ang usa ka adlaw nga walay mahimong “sideline” si Alma aron dunay dugang income alang sa panimalay.

Si Ian nga usa ka trabahante sa sagingan, pag-uli bandang alas 4 sa hapon igahin dayon ang oras diha sa pag-atiman sa panimalay. Bisan sa Lunes hangtod Sabado nga trabaho, migahin pa gyod kini ug boluntaryong serbisyo diha sa barangay ug sa ilang simbahan.   

Si Gobernador Anthony del Rosario nga usa ka “family man” kay human trabaho sa alas 5 mopauli dayon sa balay, nagpadala ug mensahe pinaagi ni Nemeses Nuñez.

“Kabalo ta nga dili lalim ang mahimong usa ka ginikanan labaw na ang pagpadako sa mga anak taliwala sa kalisod sa atong panahon karon. Gawas sa paghatag kanila sa ilang panginahanglan, importante sab nga giyahan sila sa saktong pamatasan ug disposisyon aron maglakaw subay sa maayong dalan aron mahimong mapuslanon sa atong katilingban,” pagtimbaya ug pagdayeg ni Gobernador Anthony del Rosario sa mga Huwarang Pamilya gikan sa lain-laing LGUs sa probinsya ilabina sa pamilyang Betua.

Gidayeg sab sa gobernador ang mga anak nga nagbinuotan aron hapsay ang tibuok panimalay.

“Saludo sab kita sa mga anak sa atong mga family awardees kay inyong gitagaan ug dakong bili ang kakugi ug sakripisyo sa inyong mga ginikanan. Gipakita ninyo ang maayong balos isip bugti sa ilang pag-amoma, pag-giya, pagmahal kaninyo pinaagi sa pagpaminaw sa ilang mga tambag ug pagpadayon sa inyong pag-eskwela aron pag-abot sa panahon makatindog kamo sa inyong tagsa-tagsa ka kaugalingon.”

Gawas sa pamilyang Ian ug Alma Grace Betua sa Sto. Tomas, aduna sab giilang Huwarang Pamilya 2017 sa matag LGU sa Davao del Norte.


 

More Davnor Updates at

DavNor Karon

 

DavNor News