MALAMPUSON ang gihimong pinakaunang Davao del Norte Public Auction alang sa delingkwente nga mga kabtangan ingong bahin sa positibong resulta sa gihimong kampanya sa pagpangolekta ug buhis.

Kagahapon, Martes, Disyembre 12, napulog-tulo ka mga bidders ang misalmot sa gihimong public auction alang sa napulo ka propriedad nga sakop sa New Corella, Davao del Norte.    

“First ever nga public auction. Una, mao ning gipahigayon ning atoang public auctions sa mga delinquent real properties sa probinsya tungod kay duna man tay basehanan: kadtong tax ordinance nato ug naa pod sa local government code. Ikaduha, ever since wala gyod pa maka-conduct aning kalihokan sa public auction. Usa ni sa mga tahas sa atong Provincial Treasurers Office ug sa Provincial Assessors; unya gimugna ni Gob ang atoang committee on public auction. So mao ning napahigayon ni karon,” esplikar ni Provincial Administrator Samson Sanchez.

Sa public auction mismo, nakakolekta ang probinsyal nga panggamhanan ug halos P113,000 gikan sa napulo ka mga bidders gawas sa boluntaryong pagbayad sa daghan sa ilang buluhisan.  

“Ang positive thing ini kay tungod sa pagsibya ug pag-anunsyo sa mga delinquent taxpayers nga i-subject to auction, napursige sila ug settle sa ilahang mehoras. Actually 40 kapin ning na-identify initially, hangtod nag-narrow down into 27, hangtod pagka karon nahimo na lang nga 14. So ang napulo ka buok sa New Corella mao tong successful. Dunay 4 sa San Isidro nga nabilin out of the 17, naka settle ang 13 so 4 ang nabilin. Wala may bidder, so forfeited to nga mga properties in favour of the government,” pagtug-an sa probinsyal administrador sa positibong resulta ug sa kataposang aksyon sa probinsya kung dili gyod bayaran ang mehoras.  

Sanglit matag tuig adunay tax assessment ang tanang munisipyo, gi-awhag ni PA Sanchez ang mga tag-iya ug yuta nga dili na hulaton ang rekomendasyon sa mga municipal treasurers ngadto sa provincial treasurer alang sa public auction sanglit usa kini ka obligasyon sa tanang molupyo.

“Every year dunay assessment sa mga tax delinquent properties. So kung ang komitiba base sa rekomendasyon sa Municipal Assessors ug Municipal Treasurers morekomenda sa pag public auction niana, askyonan pod na diretso sa province. . Pero unta dili ni moabot sa ing-ani nga kalihokan nga mag public auction ta, atong awhagon ang atong mga kaigsoonan nga dunay real properties nga kung pwede mobayad ta sa atoang mehoras kay mao man ni atong obligasyon isip mga mga lumulupyo sa Davao del Norte,” panawagan ug pahinumdum sa probinsyal administrador labot sa obligasyon sa usa ka Dabaonon.

Tungod sab sa public auction malipayon nga mipauli ang usa ka sa sakop sa Indigenous People (IP) nga dugay na kaayong residente sa gisubasta nga luna sanglit misugot ang laing mga bidders nga siya ang padaogon sa kantidad nga P20,000 alang sa usa ka 700 metro kwadrado nga yuta.

“Gikan pa sa akong mga ginikanan adtong 1968. . Nitibo man akong papa. . Nakaingon jud ko nga priority man kaha ang mga nitibo, mga lumad, syaro ug dili ko nila paminawon nga tinuod man gyod. . Paglumbay na nako kay naa may intresado sa 2109, akong gikuhit; sir ako man ang nagpuyo ana sir, mihawa siya. Hangtod nga kada kuhit nako walay ni-aplay, hangtod ako na lang isa. Mao tong nalipay ko, nagpasalamat pod ko kay ingon ani,” malipayong pagtug-an sa usa ka IP nga si Mrs. Alfreda Jacosalem.  

Ang tanang midaug nga bidders gihatagan ug hangtod ugma Myerkoles, Disyembre 13 aron ilang mabayaran ang kantidad ug malikayan nga ma-forfeit ang ilang katungod.


 

More Davnor Updates at

DavNor Karon

 

DavNor News