57th Araw ng Davao del Norte
57th Araw ng Davao del Norte Activities
57th Araw ng Davao del Norte Activities
Subay sa espirito sa panagdait karong Pasko, miuna si Governor Edwin “Kuya Gov” Jubahib sa paghimo'g lakang aron taposon na ang panagbangi sa executive ug legislative branches sa Kapitolyo alang sa kaayuhan sa katawhan.
Sa miaging Convocation Program sa Kapitolyo, nangayo mismo og pasaylo si Kuya Gov, labi na kang Board Member Orly Amit, ug kang Vice Governor De Carlo Uy ug ubang miyembro sa Sangguniang Panlalawigan (SP), tungod sa iyang nasulti ug nahimo gumikan sa tawhanong pagbati.
Gihataga’g hibug-aton sa gobernador nga walay maayong resulta ang panagbangi sa iyang buhatan ug sa mga miyembro sa SP.
“Gusto nako nga padayon ta… Gusto nako nga aduna tay harmony in delivering services to our constituents. Kay kung sige ta’g away-away, ang dakong apektado ani ang atong mga empleyado sa Kapitolyo ug ang atong mga constituents,” ingon ni Kuya Gov.
Miugat ang bingkil sa ehekutibo ug lehislatura sa probinsiya sa pag-kwestiyon ni BM Amit sa pag-usbaw sa budget sa buhatan sa gobernador ug provincial administrator, sa peace and order fund, ug sa pagbabag niini sa confidential fund sa gobernador sa ‘proposed’ 2023 Annual Budget sa probinsiya.
Sa kasuko sa gobernador sa giingon ni BM Amit nga kuno dunay ‘anomaly’ sa gisugyot nga pag-usbaw sa budget sa mga opisina sa gobernador ug sa provincial administrator, iyang gipaimbargo ang sakyanan nga bag-o lang gi-issue sa board member.
“Diha ko nasuko nga term. Unsa pagka-anomaly nga kuyog ka sa creation. Paghimo sa budget naa siya nag-uban. Wala gani ko… Siya ang naa kay siya ang representative sa SP sa Local Finance Committee,” gipahingusgan ni Kuya Gov.
Gipasabot niya nga ang pag-usbaw sa budget sa opisina sa gobernador kato donations aron pakusgan ang serbisyo sa iyang buhatan.
“Donations to nga nadugang para nga makahatag pa jud og extra support sa mga nanginahanglan… (apil niini) ang donations kay Vice Gov ug sa mga board members tanan ug akoa naay increase,” sulti niya.
“Nganong anomaly man jud ang term nga gigamit… very malicious,” maoy angal niya.
Gibatbat sa gobernador nga gitarong jud niya paggasto ang panudlanan sa Kapitolyo alang sa paghatud sa tinud-anay nga serbisho, nga miresulta sa daghang mga kalampusan ug awards sa probinsiya, lakip na ang pagdeklara niini isip "Insurgency-Free Province".
“Pero akong isulti sa inyoha, mangayo pud ko pasaylo kang Board Member Amit sa akong naistorya sa iya ug sa akong pagkuha sa iyang sakyanan… apil pud kang Vice Gov ug sa SP, sorry ato... Mao na giingon nga tawo ra pud ko nga mobati kasuko, ug masakitan,” sulti sa gobernador.
Human makapahungaw, sulti ni Kuya Gov nga ok na siya ug iuli na niya ang sakyanan ni Amit.
“Ako, okay na ko kay nakapahungaw na ko… katong akong confidential fund nga zero, ok na ko… wa na koy problema. Pero ang akong hangyo kaninyo nga magkuyog gihapon ta sa pagserbisyo sa katawhan… kuyog ta sa pagtuyok sa mga barangay para makita sa katawhan nga duna tay one direction to give more public service,” sulti niya.
TUMONG ug tinguha sa KAwsa sa AGrikulturA ug PAnginabuhian sa barangaY (KAAGAPAY) nga programa ni Gobernador Edwin “Kuya Gob” Jubahib nga dili lang hangtod napulo ka adlaw ang pag-atiman sa mga kahoy’ng Tugas (Molave) nga gipangtanom sa mga benepisyaryo sa Tulong Panghanapbuhay sa Ating Disadvantaged/Displaced Workers kun TUPAD.
“Dili lang ten days nga atong tan-awon ang atong kahoy. Hangyo ni Kuya Gob uban sa mga opisyales kang Vice Gov Rey T. Uy ug sa Sangguniang Panlalawigan nga unta after sa 10 days ato gihapon bisitahan ang atoang gipananom hangtod moabot ang iyang kadak-on nga kaya na niya nga mabuhi. Atong alimahan og maayo para puhon makaingon ka kanang kahoya ako’y nagtanom ana pinaagi sa KAAGAPAY ug TUPAD program,” awhag ni Davao del Norte Probinsyal Administrador Engr. Josie Jean Rabanoz.
Malipayong gitaho sa Probinsyal Administrador nga maoy mirepresentar ni Kuya Gob nga “nakasungkit” ang Gobernador og ‘funding’ gikan sa Department of Labor and Employment (DOLE) sobra Singko Milyones pesos nga gidugangan sab ni Senador Joel Villanueva og laing Singko Milyones hinungdan nga miabot og 2,621 ka mga Dabaonon sa tibuok probinsya ang masweldohan og tig P3,960 sulod sa napulo ka adlaw nga pagtanom og kahoy.
Tungod sa COVID-19 pandemic, gilunsad ni Kuya Gob ang KAAGAPAY niadtong Hunyo 26, 2020 sa tuyo nga makapatungha og pagkaon bisan sa tugkaran pinaagi’g pagpananom og gulay. Sa 2021 gipalapad ang programa pinaagi’g Re-greening project aron “ayohon” ang kinaiyahan alang sa layo’g-abot nga benepisyo.
Hinuon dili lang pagtanom og gulayon ingon man kahoy ang KAAGAPAY. Human ma-organisar ang mga purok ingong People’s Organization, libreng ipang-apod-apod ang mga manok ngadto sa mga POs aron ilang padakoon sa mga duha ka bulan. Dili maglisod ang mga mag-uuma sanglit mismo ang probinsya ang mopalit sa mga produkto base sa rasonableng presyo sa Tagum City merkado.
“Ang akoang kalipay kay naimplementar ang programa ni Kuya Gob nga KAAGAPAY. Na-launched na ni last year pero mas gipakusgan pa ni karon; mi-widened, mas midako ang scope sa programa. Tapos gidungan pod niini ang TUPAD para sa atong livelihood. Amoang gipaabot amoang kalipay kay Kuya Gob sa kini nga mga programa nga atoa jud ginasuportahan dire sa atoang lungsod,” pasalamat ni Braulio E. Dujali Mayor Atty Leah Marie Moral-Romano.
Sa Braulio E. Dujali 216 ka tawo ang mahimong benepisyaryo sa TUPAD nga nananom og mga Tugas nga giapilan sa mga opisyales sa lungsod samtang sayo-sayo sa buntag nananom sab ang KAAGAPAY-TUPAD og mamulak nga kahoy didto sa Sonlon, Asuncion.
TODO paningkamot ang probinsyal nga panggamhanan ni Gobernador Edwin "Kuya Gob" Jubahib nga "pugngan" ang padayong pagkaylap sa sakit sa baboy nga African Swine Fever (ASF) nga misabay pa sa problemang dala sa COVID-19.
Gipakusog ang DavNor Task Force ASF aron dunay magbantay 24-oras ilabina sa mga utlanan hinungdan sa pagkadakop sa lima (5) ka mga mamalitay ug baboy nga misaad nga dili na mamalit diha sa mga dapit nga apektado sa ASF.
Kanunay nga gimiting ni Kuya Gob ang mga personahe lakip na ang mga barangay opisyales sa tuyo nga adunay suod nga koordinasyon.
“Balik-balik nato ni: Kamo ang last defense nato sa Province. . , kung dili mo motabang, mag-pabaya mo sa barangay, fall down gyod ta, wala gyod ta’y mahimo. Kamo ang last defense kay kamo ang direct sa tao,” matod sa Gobernador nga nagtumong pahugtan gayod ang dobleng pagbantay kontra ASF lakip na ang COVID-19.
Giawhag sab ni DavNor Provincial Veterinarian Dr. Renato Embate ang kooperasyon ug koordinasyon sa matag barangay kay sumala sa ilang surbi, ang mga mamalitay ug baboy mao ang kusog nagpakaylap sa sakit.
"Kana siya nga barangay mag-establish na gyod ug sakto nga entry ug exit points para di masudlan sa mga traders nga kasagaran maoy nagdala sa sakit,” matod sa DavNor Veterinarian.
Samtang padayong gihatagan ug “indemnification” (bayad sa gipatay nga baboy) ang mga tag-iya, ang DavNor PVO padayong gipakusgan ang Information Education Campaign (IEC), kanunay’ng nag-monitor ug giawhag ang tanan nga dihadiha dayon i-report pananglit dunay gidudahan nga nasakit. Ang paghatag ug “lamaw” (swill) o sobrang pagkaon gikan sa mga nagtinda kusganong gidili.
BISAN kung wala na sa serbisyo, gipabilhan gihapon sa administrasyon ni Gobernador Anthony del Rosario (AGR) ang kahago nga nahimo sa mga retiradong trabahante sa Kapitolyo pinaagi sa Health and Wellness nga serbisyo sa tanang miembro sa Provincial Capitol Retirees Association (PCRA), Huwebes, Disyembre 20.
Nga gisugdan panahon ni kanhi Gobernador Rodolfo del Rosario, gipadayon kini sa iyang anak-Gobernador sa tuyo nga maseguro ang ilang kaayohan ug mapataas ang pagpakabana sa himsog nga pagkinabuhi ug aron sab makabantay batok sa mga sakit.
“Kanunay gyod nato ni ginahimo tungod kay aduna man kini siya mandato sa LGU DavNor. Ang atong hanglangdong gobernador nagasuporta gyod niini pinaagi sa opisina sa Provincial Administrator’s Office ug sa Provincial HRM office. Kada tuig naa gyod ni siya’y ginahimo nga mga aktibidades nga makalipay pod sa atoang mga retirees,” matod ni Provincial Human Resource Office department head Monica Salido.
Ang mga serbisyo naglakip sa Medical Screening/Tests alang sa Cancer detection (prostate, breast ug pap smear) ,Random Blood Sugar (RBS), Urinalysis, Eye Screening, Senior Citizens Immunizations ug Vital Signs nga nadawat sa halos usa ka gatos nga mga retirado.
“Part ni sa pag-atiman sa usa ka amahan sa panimalay. Kay bisan nag-retire na sila giisip gihapon sila nga pamilya sa Davao del Norte. Brainchild ni ni Gob RDR sa unang panahon unya gi-sustained ni Gob Anthony hangtod karon. Espesyal ni siya kay gusto ni gob nga duna gyo’y pag-atiman sa atong mga kaubanan nga nanerbisyo sa gobyerno kaniadto,” padayong pasabot ni PHRMO department head Salido.
Nga nag-ila nga duna sila’y Corporate Social Responsibility (CSR) ngadto sa publiko, ang De Veyra Optical Clinic miapil sab hatag serbisyo pinaagi sa libreng Eye Screening ug paghatag ug mga reading eye glasses.
“Mao na gyod ni atong programa gikan pa sa akong amahan. Iyang nahunahunaan kay naa man siya’y optical nga business, part niini iyang ginahatag balik sa mga tao kay importante man gud ang mata labi na sa mga retirees. Sukad sa una pa nga nanghatag, sobra na seguro dekada,” matod ni Board Member Alfredo “Tiki” de Veyra III nga nagsunod lang pod sa gibuhat sa iyang amahan nga usa ka board member ug doktor sa mata.
Mapasalamaton kaayo si PCRA president Felucio Pague kay gawas sa mga serbisyo, ang ilang panagkitaay magpasabot ug pag-kumostahay.
“Karon nga panahon ang ubang retirees wa na po’y kwarta. Makahatag ni siya ug ayuda. Maayo gyod ni nga programa; camaraderie gikan sa panahon nga naa pa sila nagserbisyo hangtod karon nga nahimo na silang retirees, kahinangop pod nga magkita gihapon sa mga panahon nga moabot, ang camaraderie magpabilin,” pasabot ni Pague nga nagtug-an sab nga ang ilang panagtapok maghatag update sa mortuary assistance nga programa sa ilang grupo.
“Dako kaayo akong pasalamat sa atong governor labi na kay RDR kay siya man gud ang founder namo dire, gitagaan gyod niya’g higayon ang mga retirees kalipay nga magkauban. Akong pasalamat kang Gob AGR ug sa iyang amahan nga unta magpadayon kining iyahang gihatag sa mga retirees,” matod ni Ms. Elsa nga kanhi 33 ka tuig nagserbisyo sa Sangguniang Panlalawigan sa DavNor Kapitolyo.
Gawas sa PGO, PAdO, PHRMO, naghiusa sab ang PHO ug PEEDO sa paghatag ug mga serbisyo, tambal ug bitamina ngadto sa mga retirado.
Open in PDF Format
