dnipc header 01

“Ang kapait ug katam-is imong masinati sa unang ingkib”.

Mao kini ang asoy ni Gng. Gemma O. Caasi, Development Management Officer II sa PADO-Davao del Norte Investment and Promotion Center (PADO-DNIPC), dungan sa pagtilaw niini sa produktong tsokolate nga kendi nga gihanyag ni Gng. Neonida Mapula, atol sa pagdangop niini sa buhatan sa DNIPC niadtong June 03, 2021.

Si Neonida Mapula usa ka mag-uuma sa cacao nga taga Brgy. Mabuhay, lungsod sa Carmen sa lalawigan sa Davao del Norte. Tuig 2019 sa dihang gisugdan ni Gng. Mapula ang pagpananom ug cacao sa ilang gipanag-iyahang usa ka ektaryang luna. Nagsugod kini’g pamaligya sa iyang abot nga cacao niadtong tuiga ug sa ngadto-ngadto naawhag kini sa pagproseso sa cacao aron nga kini mahimong tsokolate gikan sa maong prutas gumikan sa nagkadakong demand sa tsokolate ug uban pang produktong ginama gikan sa cacao dinhi sa probinsya ug ingun man sa mga kasikbit nga mga lalawigan.

Sa pagkakaron, “manual” ang gamit ni Gng. Mapula kon “mano-mano” sa pagbuhat sa mga produktong tsokolate, sanglit wala pa kini saktong mga kahimanan ug makinaryas nga mamahimong mupadali sa pagbuhat sa iyang produkto. Si Gng. Mapula naagni sa pagdangop sa buhatan sa DNIPC sa dihang iyang nahibaloan nga dunay ginatanyag nga tabang ang probinsyal nga panggamhanan sa Davao del Norte, sa panguna ni Gobernador Edwin “Kuya Gob” Jubabib, ngadto sa mga gagmay’ng magpapatigayon sa probinsya.

Ang PADO-DNIPC maoy nag-unang opisina sa probinsyal nga panggamhanan sa paghatag ug ayudang teknikal ngadto sa mga gagmay’ng entreprenor nga buot madungagan ang ilang kahibalo kabahin sa pagpromotar sa ilang produkto pinaagi sa mga pagbansay, susama sa Product Enhancement, Labeling and Packaging training seminar, Business and Entrepreneurial Management, ug Marketing and Promotion seminar. Gawas pa niini, motabang sab ang Center sa pagparehistro sa ilahang ginamang produkto sa pakig-alayon sa Department of Trade and Industry (DTI) ug sa Department of Science and Technology (DOST) alang sa dugang ayuda nga gitanyag sab sa maong mga ahensya sa panggamhanang nasyonal. Niining tungura, si Gng. Mapula hapit na usab mogradwar sa Kapatid Mentor Me (KMM), programa sa DTI nga nagahatag ug hinabang ngadto sa mga linghod pa nga mga magpapatigayon nga buot makabaton ug dugang kahibalo sa natad sa pagnegosyo.

Sa kasamtangan, ang ENZ’ TSOKOLATE ni Mapula, nga dunay sweetened ug unsweetened nga matang, iyang ginabaligya sa mga gagmay’ng tindahan sa Carmen ug sa lungsod sa Santo Tomas. Duna usab kini suki nga mamalitay gikan sa kaulohang Manila ug lakip na usab sa probinsya sa Iloilo sanglit gisudlan usab niini ang pagpamaligya sa iyang produkto pinaagi sa nauso nga “online selling”. Samtang ang buhatan sa PADO-DNIPC, sa panguna ni Gng. Joevynar M. Miedes ug sa training focal person nga si Ms. Gemma O. Caasi, mipasalig nga matabangan si Gng. Mapula sa pagdasig sa iyang produkto pinaagi sa mga seminar nga pagaapilan ni Gng. Mapula aron mas mapanindot pa ang kalidad sa kinatibuk-ang hulagway niini.

Ang ENZ’ TSOKOLATE gikatakdang idispli sa DavNor Pasalubong Shop sa dihang makompleto niini ang gikinahanglang training nga ipahigayon sa DNIPC, alang sa pagpalambo sa kalidad sa maong produkto.

DNIPC Featured News

invest nowin davnor
 
nainggo