dnipc header 01

“Samtang nagkadugay, samot nga nagkalami”

Mao kini ang giluwatang pamahayag ni Mr. Charlie Lastimoso, usa ka lokal nga entreprenor nga naggikan sa dakbayan sa Tagum, samtang iyang gipasigarbo ngadto sa buhatan sa DNIPC ang iyang produktong bino nga binuhat gamit ang iyang kahanas sa paggama niini, atol sa iyang pagbisita niadtong Mayo 7, 2021.

Sumala ni Mr. Lastimoso, ang iyang mga bino nga iyang gihinganla’g “Charlie’s Wine” maoy resulta sa iyang interes sa pagtuon sa paggama niini sa taas nga panahon. Ang Charlie’s Wine, matud niya, hinimo gikan sa nagkadaiyang tanom nga prutas nga iya usab ginakompra sa mga mag-uuma ug prutas sa nagkalain-laing bahin sa Davao del Norte. Samtang kini nagkadugay, ang kalidad sa bino nagkataas, resulta nga kini mosamot ug kalami, esplikar niya.

Anaa sa dose ka nagkalainlaing “flavor” sa kasamtangan ang timplada sa Charlie’s Wine nga mao ang dragonfruit, strawberry, yakon, durian, mangosteen, pumpkin, papaya, mango, calabash, watermelon, calamansi, ug guyabano. "Kadaghanan sa maong mga prutas ginatawag ug “tropical fruit” diin kini mamahimong itanom ug molambo dinhi sa probinsya sa Davao del Norte", dugang pa ni Lastimoso.

Segun ni Lastimoso, usa ka makuti ug taas nga proseso ang paghimo sa alak nga bino. Gikan sa pag-ani sa bunga sama sa popular nga ubas, pagdugmok niini, ug ilabina usab sa fermentation, dangtan kini ug pipila ka bulan usa makompleto ang proseso, ayha pa kini mamahimong ikonsumo. Dunay 12% nga alcohol content ang matag volume sa Charlie’s Wine, nga sakto lamang ang kaisog alang ngadto sa mga mahiligon sa wine kon bino. Si Lastimoso nga usa ka lisensyadong Electronics Engineer, kanhi manager sa usa ka Cable Company ug magtutudlo sa usa ka tulunghaan sa dakbayan sa Tagum, una pa man kini naagni sa pagbuhat ug bino. Usa lamang si Lastimoso sa mga pipila ka indibidwal sa tibuok nasud nga nalambigit sa paghimo ug bino gamit ang kaugalingong kahibalo. Nan, mamahimo kining garbo sa probinsya kung kini masuportahan sa lokal nga panggamhanan.

Sa kasaysayan sa natad sa pagbuhat sa mga ilimnong dunay alkohol, ang labing unang prodyuser sa mango wine usa ka Pilipino nga mao si Robert Castañeda. Si Castañeda ang nagmugna sa Don Roberto’s Winery sa Imus, Cavite nga nabantog sa tibuok kalibutan sa iyang pinasahi nga timplada sa bino.

Atol sa product orientation ug free taste nga gihanyag ni “Cha” Lastimoso ngadto sa mga tagdumala sa DNIPC sa panguna ni Ms. Joevynar M. Miedes, ang Local Economic and Investment Promotion Officer sa Davao del Norte, lakip na ang iyang mga kaubanan, ang DNIPC mapasigarbuhon nga duna na usab bag-ong miembro nga madungag sa ihap sa mga lokal nga entreprenor nga nagahiklad sa ilang produkto sa Pasalubong Shop, alang sa pagbaligya niini ngadto sa publiko. Samtang niining tungura, ikaduha pa lamang si Mr. Lastimoso nga tiggama ug bino dinhi sa lalawigan nga nahimong miembro sa Pasalubong Producers o kadtong dunay produktong gipromotar sulod sa Pasalubong Shop, ubos sa pagdumala sa DNIPC.

Ang Pasalubong Shop, nga nahimutang sulod sa buhatan sa DNIPC, nagatabang sa pagpromotar ug pagbaligya sa mga nagkadaiyang produkto nga hinimo sa mga lokal nga entreprenor sa probinsya. Makita sulod sa shop ang mga nagkadaiyang produkto nga resulta sa kabatid ug pagkamapaninguhaon sa mga Dabaonon sama sa mga nagkalainlaing handicraft, mga muwebles, pigurin, souvenir items, lakip na ang mga nagkalainlaing matang sa gulay, utanon, ug mga prutas nga kabahin sab sa pag-implementar sa DavNor Kaagapay nga proyekto sa kasamtangang maabtikong Gobernador Edwin “Kuya Gob” Jubahib. Samtang, mokabat na sab sa kapin 70 ka mga lokal nga mga prodyuser ang nahimong miembro sa Pasalubong Shop Producers ug natabangan sa DNIPC, sukad kini gisugdan niadtong 2012 ug nagapadayon sa gihapon kini sa pagtabang sa mga gagmayng magpapatigayon sa lalawigan sa Davao del Norte.

Sa kasamtangan, ginahikay na sa buhatan sa DNIPC ang pag-abag kang Mr. Lastimoso aron sa pagdasig sa produkto niini pinaagi sa mga lakang nga ginatanyag sa maong opisina, sama na lamang sa Product Costing, Product Packaging and Labeling Seminar, ug Entrepreneurial Management.

Ang Charlie’s Wine mapalit na sa Pasalubong Shop nga nahimutang atbang lamang sa Kapitolyo sa Davao del Norte.

DNIPC Featured News

invest nowin davnor
 
nainggo