Public Hearing sa PDPFP, malampuson
- Details
- Published: Monday, 20 November 2023 10:37
- Written by DavNor PICKMO (Nestor H. Mata, Jr.)
- Views: 404
Malampuson ang gipahigayong Public Hearing sa Provincial Development and Physical Framework Plan for C.Y. 2023-2028, sa Capitol Pavilion, DNSTC, Mankilam, Tagum City, niadtong Nobyembre 14, 2023.
Gipangunahan kini ni Atty. Devona H. Jumamil, PCL President ug kasamtagang Chairperson sa Committee on Human Settlement and Urban Development sa Hunta Probinsya, kauban ang Provincial Planning and Development Office nga gidumalaan ni Engr. Maria Hazel Zafra ug mga representante sa nagkadaiyang sektor sa katilingban.
“Nagpahigayon kita og public hearing for the approval of the Provincial Development and Physical Framework Plan tungod usa ni ka requirement, rekisitos kini for the legitimization, para ma-legit ang atong plan. This is also in preparation for the approval of the plan under sa Sangguniang Panlalawigan and of course, we are going to submit this to the two (2) National Agencies,” ingon ni Engr. Zafra.
Gikalipay ni Engr. Zafra ang katumanan nga nahitabo sa milabayng mga plano nga ilang gihimo, sama sa katukoran sa Tagum flyover ug Panabo flyover kalakip sab ang Davao-Samal Bridge ug daghan pang uban.
“Actually, kadtong atoang nine-year plan, lipay kaayo mi kay pag-check namo, checking of those projects nga na-implement, ubay-ubay ang nalista didto sa last nga approved plan. Example ana kadtong atong Tagum Flyover, Panabo Flyover, naa na sa atong plano since 2014. Malipay ka nga ma-X nimo kay others are completed, ang uban pud existing,” dugang ni Engr. Zafra.
Wala nay mamahimong babag alang sa approval sa PDPFP sa hawanan sa Sangguniang Panlalawigan. Kini ang gibutyag ni Atty. Jumamil. Dugang niya nga andam ang sanggunian sa pagsuporta sa mga plano nga gimugna ni Governor Edwin “Kuya Gov” Jubahib, nga makahatag kaayohan sa mga Dabaonon.
“Ang next move nato ani, ato ni siyang dalaon sa plenary para ang mismong mo-approve na is ang kinatibuk-an sa Sangguniang Panlalawigan and that will happen after also the presentation sa Provincial Planning and Development Office didto sa DHSUD ug sa NEDA. Tanan nga naa diri sa atong plano is all for the betterment of our province and since this is a plan, which means parang shopping list of the priorities of our governor kung unsa ang iyahang pilion diri. And kini pud siya gisabotan na sa mga sectors, gitrabahoan gyud ni og maayo. So, there’s no other way but to approve the plan nga gi-craft sa atoang mga katawhan,” sulti ni Atty. Jumamil.
Ang PDPFP mao ang inahan sa tanang mga plano nga mamahimong sumbanan sa implementasyon sa nagkadaiyang proyekto sa probinsya. Kini sab ang basehan sa nasyonal nga panggamhanan sa pagbubo og pondo sa mga nagkadaiyang proyekto.
Writer/Photos: Nestor Mata, Jr.
