Kanunay gyud nga dekalidad nga bugas humay tag-lima kilo, usa ka beef loaf, ug tulo ka sardinas ang ginatunol nga relief foods sa Probinsyal nga Panggamhanan sa Davao del Norte sa nagpungasi pa gihapon nga mga relief operation sa patag man o kabukiran.

Dili lang sa mga nabahaan sa niaging mga bulan kondili tanan na makadawat sanglit apektado ang tanan sa kalamidad. Apil na dinhi ang pagdahili sa yuta nga nakaapekto sa panginabuhi. Kini ang ginasulti sa representante ni Governor Edwin "Kuya Gov" Jubahib nga si Arnel Montero atol sa mga distribusyon sa mga kalungsoran. Gisigundahan usab sa pag-ingon nga kung unsa ang gidawat sa usa mao usab ang madawat sa tanan, dili kulang o kaha sobra.

Kapin 8,900 ka apektadong pamilya sa lungsod sa Carmen ang gitunolan sa ayuda Pebrero 22, 2024 sama sa Barangay Tubod, Mangalcal, Cebulano, Asuncion, ug Sto. Niño.

4,210 ang midawat sa susamang ayuda alang sa unom ka mga baryo sa lungsod sa Sto. Tomas sama sa San Jose, Tibal-og, Kimamon, Lungaog, New Katipunan, ug Pantaron, Pebrero 28.

Mokabat 6,161 usab ang midawat sa relief foods alang sa pito ka mga barangay sa lungsod sa San Isidro, Pebrero 29 ug kini mao ang Barangay Pinamuno, Mamangan, Sawata, Sabangan, Sto.Niño, Igangon, ug Kipalili.

Sa unang adlaw sa Marso gitunolan gilayon alang sa ikaduhang hugna sa distribusyon ang mga baryohanon sa lungsod sa San Isidro sama sa mosunod nga mga barangay:

Monte Dujali   527
Datu Balong    629
Dacudao         520
Liboton           348
Linao               670
San Miguel      497

Samtang, sulti sa tigpamaba sa gobernador nga dili man dinagko ang ayuda gikan sa probinsya apan buot gayud ni Gov. Jubahib nga ang tanan makadawat sa food assistance. Dungan usab sa pagkanayon nga ang hinabang nga gitawag og Emergency Cash Transfer (ECT) gikan sa nasyonal wala sa mga kamot sa gobernador.

"Si Kuya Gov nanghinaot nga kining mga katawhan sa Barangay San Miguel nga nalanslaydan makadawat og hinabang nga 9,960," sulti ni Montero.

Sa pikas bahin, padayon pa gihapon ang mga relief operation alang sa dugang pang hugna ubos sa pagpanguna sa taga Provincial Social Welfare and Development Office nga gitambongan nila Board Member Nicandro "Nickel" Suaybaguio, Jr., BM Prospero "Popo" Estabillo, Jr., pipila ka mga miyembro sa konseho sa matag lungsod, mga representante sa lokal nga ehekutibo, ug mga barangay functionaries.

Writer: Maria Lorna P. Tripoli