Molungtad pa ngadto sa pito ka bulan aron hingpit makabangon ang katawhan gikan sa kalamidad resulta sa shearline ug trough sa Low Pressure Area (LPA) sa miaging bulan. Kini maoy gisulti ni Governor Edwin "Kuya Gov" Jubahib sa dihang nibisita kaniya ang mga delegasyon sa US Agency for International Development (USAID), Catholic Relief Services, Philippines ug Action Against Hunger, Marso 11, ning kasamtangang tuig. Tungod niini, gikanayon ni Gov Jubahib nga dako og ikatabang ang suporta sa maong ahensiya dili lang sa pagtadlas sa kalisud sa mga nabahaan kundi sa paglahutay nga makabarog pagbalik labi na ang sektor sa agrikultura.
"My dear friends in Davao del Norte I think it takes more or less seven months for the families be able to stand of their feet again. Before I end I am very much thankful to the USAID and companies to see the situation of the Province of Davao del Norte. Thank you so much sir and ma’am," sulti ni Gov Jubahib.
Matud ni USIAD Regional Humanitarian Director Ben Hemingway, nga lakip ang Davao del Norte sa P70 milyones nga huminatarian aid alang sa mga katawhan nga naapektohan sa baha ug landslide sa mga probinsya sa Davao Region. Ang pondo igahin alang sa dinaliang pagkaon, puloy-anan, tubig, ug uban pang matabang sa mga apektadong pamilya. Gisegundahan usab kini sa pag-ingon ni Jonas Tetangco, ang representante sa Catholic Relief Services, Philippines, nga 2,000 ka mga pamilya nga labing apektado sa kalamidad pagahatagan og P10,000.
"US government USAID invest millions of dollars across the country to develop programs, to build programs not only for recovery but also to improve education and improve agriculture productivity," ingon ni Hemingway.
"USAID through Catholic Relief Services and Action against Hunger, it is funding from USAID of around 70 million pesos to support the affected families in two provinces particularly in Davao del Norte. We’re supporting 2,000 families – will be receiving P10,000 pesos cash assistance," matud ni Tetangco.
Gipaniguro ni Gov Jubahib nga kadto gayung mga grabeng naapektohan sa kalamidad ang makadawat sa ayudang pinansyal nga gisaad sa USAID. Giila sa gobernador nga ang maong delegasyon dako og ikatabang alang sa padayong pagbangon sa mga katawhan gikan sa nahiagomang danyos tungod sa baha.
Ang mga taga-USAID gilangkoban nila ni Ben Hemingway, ang Regional Humanitarian Director; Jonas H. Tetangco, ang representante sa Pilipinas alang sa Catholic Relief Services; Suresh Murugesu, ang Action Against Hunger Director; Julius Oliveros, ug uban pang mga taga-CRS.
Sa taho sa PDRRMD Head Glenda Delideli kauban ang gobernador ug ni Provincial Administrator Engr. Josie Jean Rabanoz ngadto sa USAID nga adunay tulo ka siyudad, pito ka lungsod, ug 150 ka barangay ang apektado sa kalamidad ug adunay 168,873 ang mga pamilyang apektado nga gilangkoban sa 723,097 ka mga indibidwal.
Sa dakong epekto sa agrikultura gipahayag ni Kuya Gov nga gikinahanglan gayud ang tabang sa mga katawhan ug sa agrikultura. Ang taga-USAID misiguro sa gobernador nga ang ilang ahensiya andam sa pagtabang – gikan sa pagkaon, edukasyon, panimalay ug panginabuhian, alang sa pagbangon ug paglambo.
Human sa pakighimamat sa gobernador, ang delegasyon milahos padulong sa lungsod sa Carmen aron sa pagsuta sa kahimtang niini isip usa sa mga grabeng naapektohan sa pagbaha.
Writer/Photos: Lorna Tripoli
