Mokabat 418 ka mga benepisyaryo sa Tulong Panghanapbuhay sa Ating Disadvantaged/Displaced Workers (TUPAD) sa Lungsod sa Carmen, Davao del Norte, ang nidawat sa ilang cash assistance balor P4,430 matag usa, gikan sa Department of Labor and Employment (DOLE), niadtong Pebrero 8, 2024.

Gipangunahan ni Governor Edwin “Kuya Gov” Jubahib ang maong payout nga gitambongan sa mga personahe sa DOLE Davao del Norte Field Office nga gipangunahan ni DOLE Provincial Director Erlinda Mamitag.

Giklaro ni Kuya Gov nga walay kaltas bisa’g piso ang cash assistance nga madawat sa mga benepisyaryo. Siya nagkanayon, kun adunay mga personalidad nga buot mokaltas sa bisan unsang ayuda, isumbong gilayon kaniya aron mapasakahan og kaso ug mahatag sa katawhan ang tamang cash assistance alang kanila.

“Nag-announce ko sa inyoha nga bawal kuhaan ang kwarta nga ayuda alang kaninyo kay kining kwartaha nga gikan sa National Government para sa matag-usa kaninyo. Ug kinahanglan kamo ang magpahimulos niining kwartaha ug kamo ang makagamit niining kwartaha para matabangan mo sa inyong mga kalisdanan,” ingon ni Kuya Gov.

Gikasubo sab sa gobernador nga adunay nabiktima sa ayuda scam nga nipasibaw sa maong payout, duha ka mga ginang. Ang usa nagkanayong nidawat og P10,000 nga educational assistance apan gikuha kaniya ang P9,000 (P1,000 na lang ang nabilin) ug ang ikaduha, nidawat sa P15,000 nga educational assistance ug gikuha sab ang P13,500 (P1,500 na lang ang nabilin) sa wala nila gikabutyag nga personalidad.

Nanaad si Kuya Gov nga iyang gukdon ug kasohan ang mga nagpaluyo sa maong ayuda scam aron mahatagan og hustisya ang mga biktima.

Ang mga benepisyaryo sa maong TUPAD Payout, mga miyembro sa programang KAwsa sa AGrikulturA ug PAnginabuhian sa barangaY (KAAGAPAY).

Writer: Nestor Mata, Jr.