Personal nga gitunol ni Davao del Norte Acting Governor Decarlo “Oyo” Uy ang mga food packs gikan sa Department of Social Welfare and Development (DSWD) alang sa mokabat 2,510 ka mga residente sa Brgy. Sampao, Kapalong, Davao del Norte, niadtong Abril 19, 2024.
Sa mensahe ni Acting Governor Uy, iyang gipaabot ang iyang dakong kagustohan nga mahatagan ang tanang katawhan sa gikinahanglang ayuda panahon sa kalamidad. Siya nagkanayon nga ang pagtunol sa ayuda kinahanglan walay pili ug walay sagol politika. Ang tanan gayud mahatagan.
“Kahibaw gyud baya mo, nasayod mo na ‘pag panahon gani nga adunay ipanghatag ang gobyerno, ilabi na gani naay kalamidad, kahibalo mo unsa gyud ang akoang prinsipyo. Dapat ‘pag panahon gani kalamidad wa gyud dapat pili, way politika. Dapat mahatagan gyud ang tanan,” ingon ni Acting Gov Oyo.
Gipasalig ni Acting Governor Uy nga magpadayon ang operasyon sa probinsyal nga panggamhanan bisan pa man sa nahitabong kasikas sa politika sa probinsya. Dugang niya nga dili kinahanglan maapektohan ang paghatud sa serbisyo ug pag-implementar sa mga programa sa probinsya gumikan lamang sa mga panghitabo.
“Gusto gyud nako pasabton ang tanang katawhan sa Davao del Norte. You could be assured nga hundred percent operating ang atong probinsya sa Davao del Norte. Ang tanang programa ug serbisyo, padayon gyud. Wala gyu’y putol,” dugang ni Oyo.
Gipasalamatan ni Barangay Sampao Chairwoman Arnulfa Betalmos ang buhatan sa DSWD ug si Acting Governor Uy gumikan sa paghatud sa ayuda sa iyang barangay.
Kauban sa acting governor sa paghatud sa maong ayuda ang mga personahe sa Provincial Social Welfare and Development Office, Acting Vice Governor Flopone Royle Catalan, ug District 2 Board Member Emmanuel Pamisaran.
Writer/Photos: Nestor Mata, Jr.
