Wala nakasipot sa gipahigayong disaster relief operation sa probinsyal nga panggamhanan ganinang buntag, Enero 19, 2024, ang mga residente sa pito ka mga purok sa Barangay Bincungan, Tagum City tungod sa lampas tawo o kutob sa hawak nga tubig-baha.

Ang pito ka mga purok nga grabeng nalunopan mao ang Diamante, Euphorbia, Mangga, Ilang-ilang, Sun flower, Rose, ug ang Santan nga lampas tao na ang lunop.

Nagdumili sa pagbakwit ang mga biktima sa baha sanglit naglisud na gyud sila sa pagtabok sa ilang mga pinuy-anan. Pipila usab kanila nakapahiluna sa Day Care Center tapad sa barangay hall nga nagsilbing evacuation center sa tulo ka adlaw nga sagunsong pag ulan.

Apan gipasalig ni Barangay Captain Eleonor Maug-Mendez nga ang mga hinabang gikan sa Probinsya pinaagi kang Governor Edwin "Kuya Gov" Jubahib matunol gyud ngadto kanila bisan pa nga iyang isakay sa bangka. Gipaniguro sa kapitan nga tanang sakop sa iyang barangay nga nabahaan matunolan gayud og relief foods.

Samtang ang mga pamilya nga nakahimo pa sa pagtabok gikan sa ilang mga pinuy-anan nakadawat sa mga food packs nga gipangtunol sa pagpanguna ni Board Member Nicandro "Nickel" Suaybaguio, Jr., duyog sa pipila ka mga miyembro sa konseho sa siyudad uban sa pakig-alayon sa Provincial Social and Welfare Development Office.

Writer/Photo: Maria Lorna P. Tripoli

DavNor News

https://www.high-endrolex.com/26
https://www.high-endrolex.com/26