Bisan pa man nihunong na ang ulan, lubog pa gihapon sa baha ang dakong bahin sa Davao del Norte hinungdan nga daghan ang na-stranded ug wala makatabok sa mga major roads nga nagsumpay sa Davao del Norte sa mga probinsya ug dakbayan sa Rehiyon Onse ug mga kasikbit niini.
Kahinumduman nga labihang kadako ang kadaot nga dala sa Shearline Weather System nga miigo sa probinsya sugod Enero 14. Anaa sa 89,941 pamilya o 406,374 indibidwal ang apektado samtang mukabat sa Php 198,548,660.64 ang damage sa agrikultura ug Php 1,126,240,000.00 sa imprastraktura.
Bisan pa man wala pa makabarog ang Davao del Norte human sa Shearline Weather System, laing katalagman na sab ang nagdala og kusog nga ulan nga hinungdan sa mas grabeng pagbaha, pagdahili sa yuta ug pagbakwit sa mas daghang pamilya sa mga evacuation centers. Kini gumikan sa Through sa Low Pressure nga nasinati sa probinsya sugod Enero 30. Labihang apektado ang 81 ka mga barangay ug 65,045 pamilya o 302,503 indibidwal.
Nagpatawag dayon si Governor Edwin Jubahib og emergency meeting sa mga miyembro sa Provincial Development Council-Executive Committee aron sa pag-aproba sa pag-gamit sa unexpended Local Disaster Risk Reduction and Management Fund (LDRRMF) ug ang reprogramming niini kabahin sa Calamity Response.
Gilaoman nga sa labing dali nga panahon mahimuan kini og Sangguniang Panlalawigan (SP) Adoption ug makapatigayon dayon ang SP ug session aron makahatag ang Probinsyal nga Panggamhanan og hinanaling tabang sa mga dabaonon nga labing apektado sa nasampit nga katalagman.
