Sa pagsugod sa tuig 2024, nisugat sa mga pasyente sa Davao del Norte Hospital Kapalong Zone ang mas hamugaway ug mas bugnaw nga ward human gipataoran og aircon ni Governor Edwin “Kuya Gov” Jubahib kalakip sab ang pag-abot sa bag-ong medical equipment nga C.T. Scan.

“Pwede ba nga ang atong mga patient makatilaw pud sila’g air-conditioned room nga non-paying. So, mao ning namugna nato ang atong rooms karon nga air-conditioned nga OB/Surgical Ward, duha ka operating room, and isa ka delivery room nga air-conditioned. Kaning tanan non-paying room. Nakita nato nga ang atong pagpaningkamot sa provincial government, atong ginatan-aw unsa ang mga kaayohan para sa katawhan. Gihatagan nato’g dakong importansya ang atong mga kabos nga kaigsoonan nga makatilaw sa pinakanindot nga serbisyo gikan sa gobyerno,” sulti ni Kuya Gov.

Gibatbat sa gobernador ang iyang padayong pagpaningkamot alang sa pagpalambo sa mga kahimanan ug serbisyo sa maong hospital. Nanaad kini sa paghatag dugang pondo nga mokabat sais milyones ka pesos (P6M) nga gamiton sa dugang kalamboan sa maong gambalay.

“Hangtud karon wala ta moundang sa pagpaningkamot, pagpangita og pamaagi para nga mas ma-improve pa gyud nato pag-ayo ang level of services nga kaya natong i-deliver sa akong mga kaigsoonan dinhi sa probinsya sa Davao del Norte. Katong giingon nimo Doc nga nagkinahanglan pa ka’g P6 million, ato nang alokitan para sa atong supplemental budget No. 1,” dugang sa gobernador.

Nagpaabot sa iyang dakong pagpasalamat kang Kuya Gov si Aina Timbol, representatante ni Mayor Ma. Theresa Timbol gumikan sa padayong pagpalambo sa Kapalong Zone Hospital nga mapahimuslan dili lamang sa taga-Kapalong kalakip sab sa mga kasikbit nga kalungsoran.

“Importante ang panglawas nga aspeto sa mga tawo ug kana wala nakalimtan ni Kuya Edwin. Pasalamat ta sa iyaha. Pasalamat ta kang Mayor nga naa sila’y gibutang dinhi nga budget para sa District Hospital. Dili lang taga-Kapalong ang maka-benefit ani, SIKAT Cluster, even kadtong sa taga-New Corella, taga-Sto. Tomas, dinhi nagaadto kay layo baya sila sa Tagum,” ingon ni Timbol.

Dako ang kalipay nga gibati sa mga pasyente sa maong balay tambalanan nga ilang nasinatian ang serbisyo susama sa pribadong hospital. Nagpaabot sab kini sa ilang dakong pasalamat kang Kuya Gov nga maoy naningkamot nga ma-aircon ang maong Hospital.

“Nalipay ko kay dili na igangon ang akong mama. Dili na pud igangon ang mga bata kay maglisud man gud sila kung walay aircon. Unya, wa pa gyud ta kaagi ani sauna, sa private ra gyud mi makaagi aning aircon. Karon, pasalamat gyud ko kang Kuya Gov nga naa nay aircon diri nga libre,” pagpasibaw ni Elsa Babe Atucha, kliyente.

“Hayahay gyud kaayo kay di gyud ka mag-agwanta sa kaigang. Salamat kay Gov nga aircon na gyud ang ward diri sa OB,” matud ni Jocelyn Andos.

Laraw ni Kuya Gov nga himuong air-conditioned ang tanang ward sa Kapalong Zone Hospital, kalakip sab ang Carmen Zone ug Island Garden City of Samal Zone Hospital.

Writer/Photos: Nestor Mata, Jr.

 

 

 

DavNor News

https://www.high-endrolex.com/26
https://www.high-endrolex.com/26