Walo ka mga benepisyaryo ang libreng nidawat sa ilang Certificate of Land Title atol sa gipahigayong 10th Sikwate Festival: Handog Titulo Program sa Brgy. Sawata, San Isidro, Davao del Norte, niadtong Oktubre 25, 2023.
Gipangunahan kini ni Provincial Assessor Engr. Lily Salazar ubos sa pakig-alayon ni Atty. Jhon Paul Devilleres, ang Head sa Registry of Deeds sa probinsya, kauban sab ang mga personahe sa Municipal Assessor’s Office.
Gibatbat ni Engr. Salazar ang kamandoan ni Governor Edwin “Kuya Gov” Jubahib nga dili lisud-lisuron ang mga katawhan hinungdan nga gitunol niini ang mga titulo sa yuta nga libre.
“Because of the Governor, Hon. Kuya Gov ng Masa Edwin I. Jubahib, sabi niya dili nato palisudon ang atong constituent sa Davao del Norte. Ibigay ‘yong titulo, Handog Titulo sa constituent of Davao del Norte without any payment,” pagsubay ni Engr. Salazar.
Giawhag ni Salazar ang mga benepisyaryo sa pag-adto sa buhatan sa Municipal Assessor’s Office aron mahatagan sila’g Tax Declaration nga mamahimong basehan sa ilang pagbayad sa hustong buwis sa ilang propedad.
“Dili na siya mamahimong inyoha gyud permanently without the Tax Declaration. So, first and foremost, you have to, ihatag ninyo sa Assessor’s Office kang Sir Bobong para madeklara inyohang property and of course, your duty, your responsibility is to pay your taxes every year,” sumala ni Engr. Salazar.
Gipahimangnoan ni Atty. Devilleres ang mga benepisyaryo sa pag-amping sa ilang mga naangkong titulo kay dako ang gasto kung ugaling man mawala kini. Dugang ni Atty. Devilleres nga pwede na magamit sa mga benepisyaryo ang titulong ilang nadawat sama sa pagprenda ug pagbaligya.
“Pag naa na mo’y titulo sa yuta, this is the time nga makaingon mo nga ako na gyud ang tag-iya sa yuta. Wala nay makakuha ani maski pa ang gobyerno kung walay just compensation,” ingon ni Atty. Devilleres.
Dugang ni Devilleres nga gihangyo siya ni Governor Edwin “Kuya Gov” Jubahib nga ipanghatag sa mga katawhan ang ilahang titulo nga dugay nang wala nakuha gumikan sa kapit-os sa ilahang pamuyo.
Tubagon sa probinsyal nga panggamhanan ang bayad nga mobalor P2,000 matag usa isip registration fee samtang ilibkas una sa Registry of Deeds ang pipila ka mga rekesitos sama sa Tax Clearance, Tax Declaration ug uban pa aron masayon ang pagtunol sa maong titulo.
Writer/Photos: Nestor Mata, Jr.
