Usa ka multisectoral team ang gilangkoban sa gitigayon nga Post-Disaster Needs Assessment (PDNA) ubos sa pagdumala sa Office of the Civil Defense (OCD- XI) kauban ang Regional Disaster Risk Reduction Management Council aron sa pagtumbok sa mga nadanyos resulta sa duha ka nagsagunsong pagbaha. Nagkatigom ang mga indibidwal gikan sa nagkadaiyang departamento ug ahensiya sama sa PDRRMC, social workers, engineers, DepEd ug uban pa, niadtong Marso 13. Giuna sa pag-validate ang mga barangay sakop sa siyudad sa Tagum sama sa Barangay Pagsabangan, San Miguel, Libuganon, Busaon, ug Pagsabangan.

Unang tumong sa nasangpit nga PDNA ang pagtumbok kung unsa kadako ang danyos sa agrikultura, panginabuhian ug kabalayan alang sa gikinahanglang rehabilitasyon. Lakip na niini, ang pagpamasin sa tabang nga mahatag sa nasudnong panggamhanan alang sa hingpit nga pagrekober sa mga kadaut.

Gipunting sa grupo ang siyudad sa Tagum nga una nang nitaho nga adunay P18,805,761.90 danyos sa imprastraktura, P112,317,694.61 sa agrikultura, ug liboan ang danyos sa social sector housing sa siyudad.

Ang OCD nag-validate sa mga barangay sama sa Pagsabangan, Libuganon, San Miguel, ug Busaon, ug sundan kini sa uban pang mga lungsod. Ang nasangpit nga mga barangay sa Tagum grabeng naigo sa shearline ug trough sa Low Pressure Area (LPA) sa miaging bulan.

Gibutyag ni Eirene Canlom, ang Civil Defense Officer sa OCD XI nga ang mga lungsod ug siyudad nga naigo sa kalamidad ang mopailalom usab sa PDNA.

"Gina-validate lang gyud nato. After this naga-writeshop ta together with the team para ma-consolidate – losses ug unsa ang recovery needs nato ug rehabilitation needs, short term, medium term, ug long term. And atoang ma-identify kung unsa ang mga priority strategies nato and possible funding sources could be from the local level, regional and even sa national po nga pwede maka-help sa pag-funds sa atong mga priority rehabilitation and recovery projects po.," matud ni Canlom.

Writer: Maria Lorna P. Tripoli