Disenteng panimalay nga abot-kaya sa bulsa ang hatud sa 4PH program kon Pambansang Pabahay para sa Pilipino. Kini maoy katuyoan sa Signing of Memorandum of Understanding tali sa Department of Human Settlements and Urban Development (DHSUD) ug sa Probinsyal nga Panggamhanan sa Davao del Norte.
Gipirmahan ni Governor Edwin "Kuya Gov" Jubahib ang maong MOU kauban si Randy H. Halasan, Director IV sa DHSUD 4PH Project Management Team, alang sa pagpatuman sa naasoyng programa.
Gisaksihan ang pinirmahay sa mga pipila ka mga department heads sama sa Provincial Human Resource and Management Office (PHRMO), Provincial Assessors Office, Provincial Planning and Development Office, Provincial Legal Office ug uban pang departamento sa Provincial Capitol, mga engineers gikan sa DHSUD Project Team, mga lokal nga opisyal sa nagkadaiyang lungsod ug uban pang mga nitambong.
Ang DHSUD katambayayong sa gobernador ug uban pang mga local executives sa pagpatuman sa katukoran sa housing program sa matag LGUs. Gipasabot sa taga-DHSUD XI nga ang panggamhanang nasyonal adunay interest subsidy sa matag housing unit. Kini maoy hinungdan nga mokunhod ang balayronon sa renta matag bulan.
Nasayran nga ang disenyo sa istraktura nga pagatukoron susama sa 200 units condo-type housing project sa Davao City ug kaulohang Maynila nga 4-storey building. Sumala ni Kuya Gov nga dako kining bintaha gumikan kay dili na manginahanglan og dakong luna sa yuta. Kahibaloan nga ang mga shelter agencies nga nakigduyog sa DHSUD sa maong proyekto mao ang National Home Mortgage Finance Corporation (NHMFC), Social Housing Finance Corporation (SHFC), Pag-ibig/Home Development Mutual Fund (HDMF), ug National Housing Authority (NHA).
"Ang tabang ni National Government is the interest subsidy. Now, imbes 6.25% nga interest kada tuig ang atong ibayad, si National Government mohatag siya up to 5% nga interest subsidy nga itabang sa beneficiary aron mobaba ang iyang monthly amortization," sumala ni Halasan.
Gihunahunaan sa gobernador nga gawas sa mga LGUs, ang mga empleyado sa Provincial Capitol nga walay kaugalingong pinuy-anan maka-avail sa disente ug kaya sa bulsang renta sa condo-type nga pabalay uban sa panghinaot nga kini hugtanong suportahan sa Sangguniang Panlalawigan. Samtang gikalipay sa DHSUD ang mainitong suporta ni Governor Jubahib sanglit kini dakong ikatabang sa mga katawhan nga wala pay kaugalingong pinuy-anan.
"Kini nga program kung ma-realize nato ni, maimplementa, unya mahimo ni siyang model sa ubang mga LGUs not only in the province but also for the city government and municipal government units," matud sa gobernador.
Kini nga MOA sa Province of Davao del Norte, of course, collaboration between the commitment of the Department, of course, with the local government unit nga ma-address ang housing backlog diri sa atong probinsya. So, si LGU dako kaayo iyang papel for this collaboration kay siya man o gikan man sa iya ang benefeciaries ug mag-identify siya og site. Si DHSUD ang overall enabler for this project,"sulti ni Halasan.
Kini gipahinabo Oktubre 26, 2023 sa Basilios Events Place, Barangay San Miguel Tagum City, isip kabahin sa pagselebrar sa National Shelter Month. Tumong sa DHSUD nga mapatuman ngadto sa tanang dapit ang tinguha sa nasudnong panggamhanan nga masolusyonan ang 6.5 milyones nga housing backlog sa kinatibuk-ang Pilipinhon.
Writer/Photos: Maria Lorna Tripoli
