Pagsustiner sa turismo ug pagpatuman sa mga programa ubos sa P200 milyon nga Parks Development Project, maoy nangunang katuyoan sa inagurasyon sa proyekto sa Sanipaan Boardwalk and Staging Area, niadtong Marso 2, 2024.
Ang Sanipaan Boardwalk nga mas nailhan sa pangalan nga vanishing island, makaplagan sa Barangay Tambo, Babak District, IGACOS. Inig mo-low tide, motunga ang isla nga gipalibotan og mga mangrove. Kapin P8 milyones ang maong proyekto nga adunay 320 metro ang gilayoon, lakip na ang katukoran sa tourist reception hall ug parking area.
"Isa lang kana sa 28 projects nga atong gipatuman pinaagi sa atoang P200 milyon nga Parks Development Projects and of course, kana pud nahunahunaan nato during the time of pandemic kung unsaon nato pag-recover og paspas," matud ni Dr. Noel Daquioag, ang Provincial Tourism Officer sa DavNor.
Matud ni Governor Edwin "Kuya Gov" Jubahib nga adunay ubay-ubay nga ikapasigarbo sa turismo ang Isla sa Samal nga siguradong makapaaghat sa mga dumoluong, lokal man o langyaw, labi na sa higayon nga mahuman na ang Samal Island – Davao City Connector (SIDC) Bridge. Tungod niini, angayan gayud nga iandam ang katawhan nga mamahimong responsable sa mga waste disposal, pagpanghinlo sa palibot, ug maabiabihong pamatasan sa pag-atiman sa mga turista.
Samtang, gikadismaya ni Governor Jubahib, nga mao usab ang sentimento ni IGACOS Mayor Al David Uy ang mahitungod sa suliran sa mga basic utilities labi na ang di kasaligang kuryente, nga labing gikinahanglan sa pagpalambo sa turismo.
"Yong basic utilities sinabi ko ito even ang water natin. Ito yong mga basic utilities, is a part of our development and attraction in our tourism projects, kasi kung pangit ang tubig, after mag-swimming walang pangligo, walay tubig pud maayo o kulang sa tubig pang-inom. Problema na, lalo na sa kuryente," sulti ni Gov Jubahib.
"So, ang tulay naa na. Nothing to worry about. Ug ang problema na lang gyud nato, gisulti naman gyud ni Gov, Ginoo ko, ang kuryente. Kana na lang gyud ang problema," ingon ni Mayor Uy.
Sa pikas bahin mapasalamaton ang mga opisyal sa barangay gumikan sa pagsuporta sa kalamboan sa Sanipaan Marine Park.
"So, ang amoang Sanipaan Marine Park ginadayo na gyud na siya’g mga turista. Then, mapasalamaton mi sa barangay kay ang atong mga constituents diri hinay-hinay nang naka-benefit," sumala ni Brgy. Tambo Kapt. Johnel Montes.
"Pasalamat ko sa hiniusang suporta gikan sa probinsya labi na kang Kuya Gov Jubahib ug kang Mayor Al David Uy nga gisuportahan gyud among turismo," pagpasibaw ni Miguel Sañano, Konsehal sa Brgy. Tambo.
Ang maong inagurasyon hiniusang gipahiluna sa Provincial Tourism Office, LGU IGACOS, mga barangay functionaries, pundok sa mga bangkero ug uban pa. Gitambongan kini mismo sa gobernador kauban si Board Member Helen Mae Discaya, IGACOS Mayor Al David Uy, Vice Mayor Lemuel Tesorero Reyes, Provincial Tourism Officer Noel Daquioag, Barangay Captain Johnel Montes, mga konsehal sa maong baryo, ug Rev. Fr. Ricky Peñalosa.
Writer: Maria Lorna P. Tripoli
