Gipresentar ang hulagway sa mga suspetsadong "riding in tandem" nga nikutlo sa kinabuhi sa bag-ong nidaog nga kapitan sa nasampit nga dapit pipila ka adlaw human sa Barangay Sangguniang Kabataan Election. Ang biktima nailhan nga si Engr. Albert "Epong" Saquian. Posibleng personal nga bangi ang motibo sa krimen, samtang ang uban pang anggulo padayon pang giimbestigahan sa mga awtoridad.
Ang maong mga dagway basi sa impormasyon nga nakalap sa Special Investigation Task Force Saquian. Kini ang gibutyag ni Col. Serrano atol sa press conference nga gipahinabo sa Davao del Norte Provincial Police Office, Nobyembre 15, 2023. Sa maong presscon nitambong usab sila si Acting Chief of Police sa Panabo City PMaj Jun Bautista, PLtCol Julius Borja, PLtCol Jay Dema-ala, ang Deputy Provincial Director for Operation, ug uban pa.
Sa laing bahin, laing insidente sa pagpusil-patay ang gikalambigitan usab sa bag-ong hural nga kagawad sa Barangay Sawata, lungsod sa San Isidro. Ang biktima gisulod sa iyang tindahan niadtong tungora ug gipusil sa wala mailhing suspetsado niadtng Nobyembre 14. Giila ang biktima nga si Kagawad Glen Dela Rama.
Tungod niini naalarma ang mga kapulisan ug nanawagan sa mga indibidwal nga makig-alayon kanila sa higayon nga mabutang na sa alanganin ang ilang seguridad.
"Kinsa man tong elected officials nga mamatikdan nila nga aduna silay threat sa ilang kinabuhi, moadto sila sa atong police station para mo-come up og security measures ang atong chief of police," sumala ni PCol Serrano.
Gipaniguro pa gihapon ni PD Serrano nga kontrolado sa mga kapulisan ang kahapsay ug kalinaw sa probinsya taliwala sa duha ka insidenteng pagpusil-patay sa mga bag-ong napiling opisyal sa barangay sa managlahing dapit. Giangkon niya nga usa kini ka pagsulay sa liderato karon sa mga kapulisan sa probinsya.
Kahibaloan nga dako ang pagsalig ni Governor Edwin "Kuya Gov" Jubahib sa pagpatunhay sa kahapsay ug kalinaw sa mga tinugyanan sa balaod labi pa nga deklaradong free insurgency ang probinsya ug ang hugot nga kampanya batok kriminalidad. Tungod niini, nanawagan ang kapulisan ngadto sa mga katawhan nga makigtambayayong ngadto kanila sa paghatag og saktong impormasyon alang sa hinanaling pagsikop sa mga suspek.
"Of course, it is a big challenge sa leadership sa PNP diri sa Davao del Norte kay during election declared sa Comelec Davao del Norte as no election areas of concerned. So, after the election nahitabo to sa Panabo. Then, nasundan sa San Isidro. So, big challenge ni sa amoa nga wala tay areas of concerned during election period, then, nahitabo ni karon after the election. So, it is a big challenge but we will face it,” ingon sa PNP DavNor Provincial Director.
Panawagan sa PNP ngadto sa publiko, mag-igmat kanunay labi na og makadawat nga hulga sa kinabuhi ug mamatikdang dunay mga tawong kaduda-duhanan sa palibot. Ug alang sa makahatag og impormasyon sa pagsulbad sa kaso sa duha ka biktima, dunay ganti nga P500,000. I-text o tawagi ‘ni nga numero, 09638912877.
Writer/Photos: Maria Lorna P. Tripoli
