Mapasigarbohon nga gihatagan og pag-ila sa PhilHealth Regional Office XI ang pipila ka opisina ilawom sa probinsyal nga panggamhanan sa Davao del Norte sa gipahigayon nga Sidlak 2023: A PRO XI Stakeholders Night niadtong ika-17 sa Nobyembre sa Arcadia Event Center sa Ecoland, Davao City.
Malipayon nga gidawat sa Davao del Norte Hospital - Carmen Zone ug Davao del Norte Hospital - Kapalong Zone ang ganti nga Highest No Balance Billing (NBB) Compliance Rate. Ang NBB mao ang polisiya sa PhilHealth nga nagtumong sa paghatag sa mga piho nga miyembro og libre nga access sa nagkadaiyang healthcare services.
Kahinumduman nga ang NBB kon Zero Billing Program usa sa flagship programs sa administrasyon ni Governor Edwin “Kuya Gov” Jubahib, diin kapin 100,000 na pasyente ang nakabenepisyo sa libre nga pagpa-ospital.
Giila usab sa maong kalihokan ang PTV-DavNor o PICKMO ingon nga usa sa mga Top Provincial Media sa Davao del Norte. Giila ang mga giingon nga opisina tungod sa ilang makanunayon nga pagpaningkamot ug bililhong suporta nga nakatabang sa PhilHealth Region XI sa pagkab-ot sa mga tumong sa National Health Insurance Program (NHIP).
Nasungkit usab sa PICKMO ang kampeyonato sa gipahigayon nga MUGNA 2023: PhilHealth Creative Shorts o Media Got Talent. Gihimo ang maong panag-indigay para magpasundayag ang lima ka mga piling ahensya gikan sa Region 11 sa pagtuboy sa KonSulTa Package sa PhilHealth.
Gimugna sa PhilHealth ang maong kalihokan para magpasalamat sa ilang mga partners ug stakeholders tungod sa ilang madasigon nga mga kontribusyon nga nakatabang para makab-ot sa ahensya ang ilang mga tumong ug sa pagpadayon sa ilang UHC programs, ilabina ang KonSulTa Benefit Package.
Writer: Hannah ZafraPhotos: Cyril Terona, Mahersal Basa, Rovel Tabelon
