Gipabibo ang duha ka adlaw nga panapos nga programa alang sa Government Internship Program (GIP) sa kapin 300 ka mga interns gikan sa nagkadaiyang lokalidad. Gipangunahan sa Department of Labor and Employment Regional Field Office XI ang mga aktibidad duyog sa tanang Public Education and Employment Services Office (PEESO) Managers sa 11 ka mga LGUs. Kini gipahinabo sa Tagum City Historical and Cultural Center, Nobyembre 7-8, 2023.
Sa unang adlaw sa maong patigayon, gipasabot ni DOLE XI-Field Office Provincial Employment Focal Jennylyn Rosalinda, ang mga responsibilidad kalabot sa plastic packaging waste nga nakalatid sa R.A. 11898 nga mao ang Extended Producer Responsibility (EPR) Act of 2022. Buot sa naasoy'ng departamento nga ang mga GIP interns magpakabana sa kinaiyahan.
Samtang sa ikaduhang hugna sa culmination, nagkalain-laing pakontes ang milingaw kanila sama sa GIP Cares, GIP Experience, Quiz Bee, Modern Dance, ug Eco-Craft. Minor awards ang gitunol alang sa napiling Most Eloquent ug Darling of the Crowd. Samtang, gipaalegre pag-ayo ang palibot sa dihang giproklama ang mga major awards sa mga palarang midaog sa kompetisyon gikan sa 1st hangtod 5th runner ups, ug ang pagkorona sa Mr. and Ms. GIP Davao del Norte 2023.
Kining tanan, gidumalaan ni DOLE Provincial Head Angelina Talingting, ug gisaksihan sa mga panel of judges sama ni PICKMO Head Dr. Mervin Jay Suaybaguio, pipila ka mga stakeholders, GSIS representatives, DOLE XI Assistant Regional Director Atty. Jason P. Balais ug uban pang mga dinapit.
"Nalipay ba mo nga you are part of the GIP program? That means, of course, that DOLE shall continue to commit to provide this opportunity for our young people to be able to experience what it is like to work in the government. And what is the benefits that they can get having experience worked in the government and the local government unit," sulti ni Atty. Balais.
Kahibaloan nga ang DOLE GIP, usa ka programa sa gobyerno nga adunay temang, “GIP: Katuwang sa Pagkamit ng Bagong Pilipinas". Kini naghatag og kahigayonan sa pagpangempleyo alang sa high school, technical-vocational o kaha college graduates. Ang mga interns makabenepisyo sa programa sulod sa tulo ngadto sa unom ka bulan nga pagpanarbaho sa panggobyerno ug makadawat sa minimum nga suholan.
Ang Davao del Norte Team ubos sa liderato ni Governor Edwin "Kuya Gov" Jubahib gidayeg ni DOLE ARD Atty. Balais tungod sa mainitong suporta sa pagdawat sa mga GIP interns nga gidestino sa nagkadaiyang buhatan sa Provincial Capitol ug sa nagkadaiyang LGUs.
Writer: Maria Lorna P. Tripoli
