Gisagot dayon ni Governor Edwin “Kuya Gov” Jubahib ang pagpaayo sa lima ka daot nga mga mobile patrol vehicles sa Tagum City Police Station (TCPS), aron mahimo kining mas epektibo sa pagpatuman sa kahapsay ug kalinaw sa dakbayan.

Sa gipahitabong Command Conference sa Davao del Norte Police Provincial Office (DNPPO) kagahapon, gibutyag ni Tagum City Police Chief Lt. Col. Jeffrey Latayada ang kakulang sa patrol cars sa TCPS gumikan kay daot ang lima ug upat na lang ang nagdagan niini.

Rason nga misiaw ug migara na pud ang mga kriminal sa Tagum gumikan sa kakulang sa police visibility nga maoy pinakaimportanteng sangkap aron mapugngan ang krimen, matud sa opisyal.

Wala pa mahuman sa iyang mulo si Latayada, misabat dayon si Kuya Gov nga iyang saguton ang pagpaayo dayon sa mga daot nga mobile patrol cars sa TCPS.

“Ganito na lang, yung limang mobile dalhin mo agad sa (pangalan sa car repair shop) ngayon. Itawag mo sa mga driver, sabihin mo ako ang nagpadala, si gov ang nagpadala para ma-priority… ako ang sasagot lahat,” sulti sa gobernador.

Kini miani og makusog nga palakpak gikan sa mga police officials sa DNPPO.

Gipaapil pud ni Kuya Gov pagpasulod sa maong shop sa patrol car nga iyang gihatag sa stasyon nga duna na po’y gamay’ng diperensiya.

Dugang niini, gibutyag sab sa gobernador ang iyang paghatag sa tagsa ka service vehicles alang sa PNP-Intelligence Group ug sa Police Special Operations Group (PSOG).

Sa pag-agni ni DNPPO Chief PCol. Alexander Serrano, Jr., misulti ang mga chiefs of police sa mga panginahanglanon sa ilang nagkadaiyang stasyon, aron mapalig-on ang ilang pagpatunhay sa kahapsay ug kalinaw sa tibuok probinsiya.

Mipasalig si Kuya Gov nga himuon niya ang tanan kutob sa iyang mahimo aron mahatag ang mga request sa kapulisan, bisan pa kung mokuot siya sa iyang sariling bulsa.

Kini tungod kay karong tuiga gilimitahan na sab ang pondo alang sa iyang mga programa sa kahapsay ug kalinaw, sanglit P25 million ra ang Confidential Fund nga gihatag kaniya sa Sangguniang Panlalawigan (SP).

Bisan pa man niini, gimando ni Kuya Gov sa kapulisan ang “pag-minimize sa mga shooting incidents” ug sa pagpakusog sa kampanya batok illegal nga droga, sugal, pagpanulis, ug uban pang kriminalidad.

 

 

 

DavNor News

https://www.high-endrolex.com/26
https://www.high-endrolex.com/26