Gipasabot ni Provincial Administrator Engr. Josie Jean Rabanoz nga adunay pondong panalapi gikan sa nasudnong panggamhanan kantidad P9,960 matag pamilyang nabahaan ang ihatag. Atol kini sa relief food distribution diin si PA Rabanoz ang nahimong tigpamaba kang Governor Edwin "Kuya Gov" Jubahib.
Sulti ni Rabanoz nga walay problema kang Governor Jubahib kung kang kinsa ipaagi sa nasyonal ang pagtunol sa maong salapi, ang importante nga madawat sa mga katawhan ang sakto nga kantidad ug dili pagakaltasan.
Dili buot ang gobernador nga ang ginadawat karon nga P9,960 masusama sa nahitabo sa programa sa DSWD nga mao ang Assistance to Individual In Crisis Situation (AICS) nga ang mga benepisyaryo gipangkaltasan, basi sa reklamo sa mga biktima sa Ayuda Scam nga karon anaa na sa paggisa sa komitiba sa senado. Panawagan ni Kuya Gov pinaagi ni PA Rabanoz nga magmaigmat ang tanan ug kung pila ang kantidad nga gipermahan mao gayud ang ilang pagadawaton.
"Pasalamat ta nga adunay ayuda ang national government pero atoa nang kwarta nga atong giamot sa government ibalik. Ug tama lang pud nga ibalik sa katawhan nga nanginahanglan. So, atong bantayan na nga pondo, bisan pa’g kinsa mohatag ana sa atoa, okay ra kaayo si Kuya Gov. Ang importante nga madawat sa katawhan," sumala ni PA Rabanoz.
Dugang gipasabot ni Rabanoz nga ang gitunol ni Pangulong Ferdinand "Bongbong" Marcos, Jr., nga hinabang nga pondo balor P30 milyones, igahin alang sa ikatulong hugna sa relief foods operation sa tanang apektado sa kalamidad dala sa shearline ug trough sa Low Pressure Area (LPA) sa probinsya.
Samtang sa ikaduhang hugna sa "KAAGAPAY sa Kalamidad ng DavNor", Pebrero 15, 2024, mga nagpungasing ayuda ang gitunol sa 6,225 ka mga pamilya sa pito ka mga baryo sa lungsod sa Asuncion. Ang mga gitunolan sa relief foods naggikan sa mga barangay sama sa mosunod:
Binancian 876
Buan 485
Sonlon 816
Camansa 600
Napungas 642
Concepcion 969
Sagayen 1,837
Gumikan kay naapektohan ang tanan sa sunod-sunod nga mga pagbaha, matag pamilya na ang makadawat sa ayudang pagkaon. Kini ang gipahayag ni Asuncion Bise Mayor Renante Ayucan kauban ang pipila ka mga miyembro sa ilang konseho.
"Kanunay lang ta magbinantayon. Kanunay lang ta magsuportahay. Though, naa man tay politikanhong differences, part lang na sa atong pagtubo. Pero ang pinakaimportante mag-focus ta asa ta makatabang, unsaon nato pagtabang ang katawhan sa Asuncion," matud ni BM Ayucan.
Ang "KAAGAPAY sa Kalamidad ng DavNor" padayon pang mitunol hangtod karon og mga hinabang pagkaon sa tibuok probinsya kutob sa mga naapektohan sa baha. Gipangunahan sa Provincial Social Welfare and Development Office (PSWDO) ang pagpang-apod-apod sa tag-lima ka kilong bugas, tulo ka sardinas, ug usa ka beef loaf ngadto sa mga baryohanon.
Kauban sa distribusyon sila si Board Member Nicandro "Nickel" Suaybaguio, Jr., BM Prospero "Popo" Estabillo, Jr., mga konsehal sa Tagum, Jan Dmitri Sator, Ronald "Nono" Eliot, mga barangay functionaries ug uban pa.
Writer: Lorna P. TripoliPhotos: Andew John Suaybaguio Hababag
