Tagsa-tagsang gigawas sa grupo sa mga rescuers ang pipila ka mga empleyado sa kapitolyo nga nakahiagom og injury gumikan sa pag-igo sa kusog nga linog. Aduna usab niambak gikan sa second floor sa Capitol Main building. Apan kining tanan, kabahin lamang sa gipahigayong earthquake drill nga gipangunahan sa Provincial Disaster Risk Reduction Management Division, Nobyembre 9, 2023.
Bandang alas-9 sa buntag, nitingog ang kusog nga sirena isip pagpahibalo nga adunay linog nga nahitabo. Gilayong gisul-ob sa mga personahe sa kapitolyo ang ilahang mga hard hat. Nitago gilayon sila ilawom sa ilang mga lamisa. Pagkahuman sa 60 segundos, hinay-hinay silang nigula sa ilang mga opisina padulong sa nakalatid nga evacuation area nga nahimutang atubangan sa Capitol Main Building.
“Bag-o lang ta ni-participate sa simultaneous earthquake drill sa last quarter karong tuiga, diin atong giandam ang mga personahe diha sa main building, kung unsaon paghimo sa drop, cover and hold in the event nga adunay kusog sa pagtay-og sama sa linog,”ingon niEric Rosillo, LDRRMO III ug kasamtangang Operation and Warning Section Chief.
Sumala niya, nga gihimo ang maong earthquake drill aron pagpangandam sa umalabot nga susamang kalamidad, mahibaloan ang angayang buhaton ug masuta ang mga kakulangon panahon nga moigo ang linog. Samtang gikalipay ni Rosillo ang nakitang aktibong partisipasyon sa mga personahe sa kapitolyo.
“Ang main purpose nato: awareness ug pagpangandam especially sa kusog nga linog. Nalipay mi’g dako kaayo base sa feedback sa atong mga evaluators from Bureau of Fire, PNP ug mga in-house nato nga mga evaluators diri sa PDR nga bisan pa taod-taod na ta nag-conduct og earthquake drill sa main building, very satisfactory kaayo ang resulta. In other words, pasado kaayo ang ilang gihimo nga pag-perform,”matud ni Rosillo.
Nahimong mga evaluators ang mga sakop sa Davao del Norte Police Provincial Office ug Davao del Norte Bureau of Fire Protection. Nagkahiusa kini sa pagdayeg sa nahimong overall performance sa mga empleyadong nipartisipar sa maong earthquake drill.
Ang maong earthquake drill gitigayon dili lamang sa Davao del Norte kondili sa kinatibok-an sa nasud nga gipartisiparan sa nagkadaiyang ahensiya sa gobyerno, mga tulunghaan ug uban pa, aron pangandaman ang pag-abot sa “The Big One”.
Writer/Photos: Nestor Mata, Jr.
