Nipatigbabaw ang kalipay ug kadasig sa mga abilidad sa mga senior citizens sa dihang gipahigayon ang Ballroom Dancing ug Song Duet Competition. Kabahin kini sa Filipino Elderly Week Culmination sa Robinson's Place Tagum, Nobyembre 21 nga adunay temang "Resilience of older persons in a changing world". Kahibaloan nga ang elderly week ginasaulog sa unang semana sa matag bulan sa Oktubre apan gumikan sa BSK Election, gi-oktaba sa probinsya sa bulan sa Nobyembre.
Nagsangka ang matag pares nga mga elders nga nagrepresenta sa ilang lokalidad sa pagsalmot sa nagkadaiyang kompetisyon. Si Provincial Administrator Engr. Josie Jean Rabanoz maoy tigpamaba ni Governor Edwin "Kuya Gov" Jubahib, duyog sa Provincial Social Welfare and Development Office nga nagdumala sa naasoy'ng panagtigom. Duyog usab sila Senior Board Member Flopone Royle Catalan sa Sangguniang Panlalawigan. Anaa pud ang representante sa National Commission for Senior Citizen, ang Provincial Health Office, Provincial General Services Office, Provincial Disaster Risk Reduction Management Office, Provincial Information, Communication, and Knowledge Management Office, ug uban pa. Ang mga elders gikan sa nagkadaiyang pederasyon, ug Office of the Senior Citizens Affairs (OSCA) sa matag lokalidad.
Gitunol ang mga libreng serbisyo sa gatosan ka mga elders sama sa pagkonsulta sa panglawas, paghatag og mga eyeglasses, ug pag-apod-apod sa mga bitamina ug tambal. Adunay kombati sa dulang chess ug dama nga gisalmotan sa mga senior citizens, babae man o lalaki. Dili katupngan ang ilang gibating kalipay ug mga hudyaka sa matag presentasyon.
Irespeto ug tagaa’g bili ang mga katigulangan ug tubagon ang ilang mga panginahanglan. Kini maoy kinauyokang mensahe nga gipaabot ni Governor Edwin "Kuya Gov" Jubahib ngadto kanila. Samtang, ang representante sa National Commission of Senior Citizens nag-engganyo sa mga nahisgotan nga magparehistro pinaagi sa online registration.
"Pinaagi sa maong selebrasyon gipahinumdom usab kanato ang importansya sa pagsiguro nga ilang katungod irespeto, ang ilang mga panginahanglan matubag, ang ilang mga tingog madungog, ug ang ilang mga kinaadman mapasa sa mga henerasyon nga nagsunod. Ang atong paghatag og importansya sa atong katigulangan dili mahuman sa pagtapos sa atong pagsaulog sa elderly week. Apan, usa kini ka nagpadayong kaakohan nga atong dad-on tibuok kinabuhi agi’g paglantaw sa ilang dakong kontribusyon sa atong katilingban," sumala ni PA Rabanoz.
"Our appeal to the municipal workers, to the officers sa atong mga kaubanan sa trabaho nga ania karon diri sa local government, please help us in the registration of the online registration because there are still so many wala didto sa atong online registration sa National Commission. Do not believe on that, nga once registered namo automatic makapensyon. Wala siya," matud ni Maria Victoria Arancon, representante sa National Commission of Senior Citizen.
Writer/Photos: Maria Lorna P. Tripoli
