Nalipay kaayo si Governor Edwin “Kuya Gov” Jubahib sa pagdagsa sa mga hinabang alang sa mga kabus sa probinsiya, pero suko jud siya kung kuhaan kini kay labaw ning pagdaog-daog sa katawhan nga dugay nang galisod.
Giklaro sa gobernador nga walay problema kaniya ni bisan kinsa man ang nagahatag og tabang sa mga pobre, labi na sa mga nabiktima sa pagbaha, basta dili lang kuhaan ang kwarta para kanila.
“Bisan kinsa nanghatag basta ang katawhan natabangan, dako kaayo akong kalipay ana. Ang dili lang nako gusto nga ang kwarta nga para sa katawhan maoy kuhaan… “Di jud ko mosugot… diha jud ko nasuko,” ingon ni Kuya Gov, atul sa relief operations sa pila ka mga barangay sa lungsod sa Carmen, Davao del Norte.
Kahinumduman nga mipasang-at og reklamo ang gobernador kang Senador Ronald “Bato” Dela Rosa bahin sa gipangkuhaan nga ayuda niadtong miaging tuig. Rason nga nagpahigayon og hearing ang Senado bahin sa ‘Ayuda Scam’ niadtong Enero 23, 2024.
“Dili jud ko gusto nga ang katawhang naglisod daog-daogon,” dugang ni Kuya Gov.
Sa milabay nga Pebrero 21 ug 22, dunay 9,967 ka pamilya ang nahatagan sa food packs gikan sa opisina ni Vice President Inday Sara Duterte-Carpio alang sa mga barangay sa San Isidro, Anibongan, Ising, ug Alejal, samtang duna sab 4,818 ka pamilya ang gitunulan og relief goods sa probinsyal nga panggamhanan sa Davao del Norte gikan sa barangay Magsaysay, New Camiling, Taba, ug Lapaz, tanan sa lungsod sa Carmen.
Ngan nga duna’y tabang pinansyal para sa mga pamilya nga nabahaan gikan sa nasyonal nga panggamhanan nga nagkantidad og P9,960, gipahinumduman ni Kuya Gov ang katawhan nga magbantay sa mga ayuda nga dawaton, og dili jud musugot nga kuhaan kini.
Mukabat na sa 127 ka barangay sa tibuok probinsya sa Davao del Norte ang labihang naapektohan sa nahitabo nga duha ka hugna sa pagbaha ug mga landslide sa bulan sa Enero ug Pebrero. Halos katunga na sa kinatibuk-ang populasyon sa probinsya ang nahimong biktima, kung asa aduna na’y 157,000 ka pamilya ug 640,000 ka mga indibidwal ang opisyal nga natala.
