Liboan ka mga Kapalongnian ang nipartisipar sa gipahigayong Kapalong Peace Day 2024 sa Kapalong Green Paradise, Maniki, Kapalong, Davao del Norte, niadtong Marso 22, ning tuiga.
Sa mensahe ni Kapalong Mayor Ma. Theresa Timbol, nga hingpit nang naangkon sa taga-Kapalong ang kalinaw sa hisgutanang insurhensiya kay pipila na katuig ang nakalabay sa dihang nadeklara ang maong lungsod isip insurgency free. Apan, adunay kagubot ang nasinatian sa maong lungsod gumikan sa pagpakuyanap sa pipila og fake news nga nakahatag kalibog sa mga ordinaryong lungsoranon.
“Kami mga opisyals, vulnerable kaayo mi og mga fake news, labi na karon sa mga issue sa ayuda nga wala naabot nga gisaad sa uban nga mga politiko. Ang pasanginlan kami nga naa diri sa local government nga bakak siya kaayo. It caused division diha mismo sa barangay,” sulti ni Mayor Timbol.
Giklaro ni Mayor Timbol nga dili siya mobabag sa pagsulod sa mga ayuda sa iyang lungsod apan nihangyo kini sa mga ahensya sa gobyerno nga buot mohatag og nagkadaiyang ayuda nga mo-coordinate kanila aron ilang matabangan ug mamonitor sab nila ang mga benepisyaryo nga natunolan.
“100% gyud na bakak. In fact, makita ninyo sa mga letters nga among ginapadala sa DSWD Regional Office, puro mangayo’g hinabang. Mao gyud na ang tinuod dinha. Never mi nagsulat nga moingon ko nga dili hatagan, babag ko, kay grabe man gani ang atong pagpaningkamot nga kung makatapad ta’g regional director, bai-id gyud ta para makahangyo ta, project man, serbisyo, ug unsa nga mga assistance ang mahatag,” ingon sa mayor.
Nahimong keynote speaker sa maong kalihokan si Ret. MGen. Reuben S. Basiao, kanhing komander sa 10thInfantry Division, Philippine Army, nga nakabasi sa Tuboran, Mawab, Davao de Oro. Nipaambit kini sa iyang mga kasinatian samtang anaa pa sa aktibong serbisyo sa kasundalohan. Siya nagkanayon nga dili masulbad ang insurhensiya pinaagi sa giyera apan sa maayong panagsabot.
Nalingaw ang mga kapalongnian sa pagsud-ong sa Youth for Peace Contest sama sa musical play, mural painting, ug tiktok challenge. Alang sa Mural Painting Contest barangay category, nakuha sa Brgy. Pag-asa ang unang ganti, ikaduha ang Brgy. Maniki, ug anaa sa ikatulong ganti ang Brgy. Sampao. Alang sa Mural Contest school category, nakuha sa Kapalong College of Technology Inc. ang unang pwesto, gisundan sa Kapalong College of Agriculture, Sciences and Technology, ug ikatulo ang Maryknoll School of Maniki. Samtang, gideklarang champion sa Tiktok Challenge Contest ang Brgy. Katipunan, ikaduha ang Brgy. Capungagan, ug naplastar sa ikatulong pwesto ang Brgy. Sampao.
Human sa awarding ceremony, gipahigayon ang community singing ug ceremonial candle lighting isip pagmantala ug pagpalambo sa naangkong kahapsay ug kalinaw sa komunidad.
Niduyog sa maong kalihokan ang mga kadagkoang opisyal sa probinsya nga gipangunahan ni District 1 Congressman Pataleon D. Alvarez, Board Member Prospero Estabillo, Jr., BM Helen Mae Descaya ug Executive Assistant Arnel Montero isip representante ni Governor Edwin “Kuya Gov” Jubahib.
Ang kasaulogan sa ika-walo ka tuig nga Kapalong Peace Day pinasubay sa Municipal Ordinance No. 1023 series of 2017, nga nagdeklara sa katapusang adlaw'ng Biyernes sa Marso matag tuig isip pagsaulog sa Adlaw sa Kalinaw sa Lungsod sa Kapalong.
Writer/Photo: Nestor Mata, Jr.
