News

Pinakauna nga DSPC sa San Isidro, gipahigayon!

Details

Published: Tuesday, 23 January 2024 17:11

Written by DavNor PICKMO (Hannah Zafra)

Views: 159

Malamposon ang pagpahigayon sa pinakauna nga San Isidro District Schools Press Conference sa Davao del Norte Sports and Tourism Complex Gymnasium ug Bulwagan ng Karanungan Hall niadtong Lunes, Enero 22. Nakigtambayayong ang distrito sa opisina sa Provincial Information, Communication, and Knowledge Management Office (PICKMO) aron mapahitabo ang maong aktibidad.

Gipahigayon ang pinakauna nga Press Conference para sa mga campus journalists sa San Isidro aron mapahanas ang ilang abilidad sa News Writing, Feature Writing, SciTech writing, Column Writing, Photojournalism, Editorial Cartooning, Editorial Writing, Sports Writing, Copyreading and Headline Writing, Radio Broadcasting, ug TV Broadcasting. Batikan ug inila nga mga journalists gikan sa Davao del Norte ang nangusog sa paghatag og lecture sa mga estudyante ug namili kung kinsa ang mga pambato sa distrito karong umaabot nga Division Schools Press Conference.

Sumala sa mga estudyante, dako ang ilang kalipay tungod kay daghan sila og natun-an sa ilang pag-apil sa mga lectures ug sa kompetisyon. Dugang pa nila, tungod kay gikan pa sila sa layong dapit sa San Isidro, mao kini ang pinakaunang higayon nga nakagamit sila sa mga pasilidad sa PTV studio sama sa recording booth niini, nga dako og tabang sa ilang pagpangandam para sa umaabot nga Division Schools Press Conference. Kauban ang ilang mga coaches, nagpasalamat pud sila sa makanunayong suporta ni Governor Edwin “Kuya Gov” Jubahib para sa mga katikaran nga makapalambo sa ilang kahanas.

Pinaagi sa pagpahitabo sa District Schools Press Conference and Training para sa mga campus journalist sa San Isidro, padayon ang suporta ug pagpaningkamot ni Kuya Gov ug sa probinsyal nga panggamhanan sa Davao del Norte aron mas mapauswag pa ang kalimuhagan sa mga kabatan-onan sa journalism.