Mga biktima sa kalamidad sa DavNor, natunola’g financial assistance
- Details
- Published: Monday, 25 March 2024 09:29
- Written by DavNor PICKMO (Nestor H. Mata, Jr.)
- Views: 219
Trayntay Sais ka mga benepisyaryo nidawat og financial assistance gikan sa Probinsyal nga Panggamhanan sa Davao del Norte ubos sa pagdumala ni Governor Edwin “Kuya Gov” Jubahib sa VIP Clubhouse, Davao del Norte Sports and Tourism Complex (DNSTC), Mankilam, Tagum City, Marso 8, ning kasamtangang tuig.
Sumala ni Provincial Social Welfare and Development Officer Rosalinda O. Rapista, nga naningkamot ang probinsyal nga panggamhanan pinaagi ni Kuya Gov nga makahatag sa maong pinansyal nga ayuda aron makapahupay sa mga kalisdanan nga nasinati sa mga benepisyaryo.
“Sa akong ginaingon, dili man gyud ni siya dako apan naningkamot ang provincial government pinaagi kang Kuya Gov nga makahatag og assistance sa inyoha, nga makapahupay pud sa inyoha, sa atong mga kaigsoonan labi na ‘tong nawad-an og kauban nato sa kinabuhi sa panahon atong baha. Ug nanghinaut kami nga kining tabang bisan gamay, kinasing-kasing gyud kining gihatag gikan sa atong provincial government,” sulti ni Rapista.
Sa mensahe ni Kuya Gov pinaagi ni Architect Lemuel Puerto, nagpaabot sa iyang pasalamat ang gobernador sa mga ahensiya sa gobyerno nga maoy tinubdan sa pondo nga gitunol ngadto sa mga benepisyaryo. Dugang niya, kanunay naghunahuna si Kuya Gov sa mga katawhan ilabi na panahon sa kalamidad. Giawhag ni Puerto ang mga benepisyaryo nga dili magpanuko sa pagdangop sa gobyerno panahon sa ilang kalisdanan ug mga katalagman kay si Kuya Gov andam motabang sa tanang panahon.
“Si Kuya Gov kanunay naghunahuna sa kaayohan sa katawhan sa Davao del Norte. Dili man niya mahatag ang dinagko nga mga kantidad pero sa bisan sa ginagmay hinaut inyong mabati ang iyang dakong pagtagad ug paghigugma kaninyo nga iyahang gialagaran sa probinsya sa Davao del Norte,” matud ni Puerto.
Nipadangat sa iyang dakong pagsimpatiya sa mga benepisyaryong biktima sa managlahing kalamidad si Board Member Nicandro Suaybaguio, Jr. Matud pa, dili lalim ang masunogan ug maigo sa kalamidad. Nalipay si BM Nickel sa pag-abot sa daghang ayuda dinhi sa probinsya nga gikan sa nasyonal nga panggamhanan apan nipahimangno kini, kung pila ang gipirmahan sa mga benepisyaryo mao gayud ang ilang dawaton. Nanghinaut sab siya nga moabot ngadto sa angayang benepisyaryo ang mga ayuda ilabi na sa mga biktima sa milabayng pagbaha.
“Sa kasamtangan, si Kuya Gov, padayon ang pagpaningkamot nga makasungkit ta’g mga programa sa nasyonal. Kay kung saligan lang nato ang atong budget dili gyud makaya. Kinsay nakadawat na diri’g ECT? Emergency Cash Transfer P9,960. Daghan pay wala, so kinahanglan gyud sa akoang nasayran nga kadtong mga nabahaan dapat gyud to makadawat,” sumala ni BM Nickel.
Sa kinatibuk-an mokabat P255,000 ang pondong natunol ngadto sa mga benepisyaryo nga gilangkoban sa mga mosunod; tulo ka mga namatyan gumikan sa milabayng pagbaha, 12 ka mga distressed/repatriated Overseas Filipino Worker (OFW), ug 21 ka mga nasunogan sa managlahing lugar sa probinsya.
Writer/Photos: Nestor Mata, Jr.
