Mikabat sa 200 ka relief packs ang gitunol sa Philippine Amusement and Gaming Corporation (PAGCOR), uban sa Philippine Air Force (PAF) nga mitabang sa transportasyon, ngadto sa mga nabahaang residente sa Barangay San Isidro, Carmen kaniadtong Marso 8, 2022.

Ang matag relief pack adunay sulod nga lima (5) ka kilong bugas, lima (5) ka kilong asukar, napulo (10) ka pirasong coffee stick, lima (5) ka pirasong instant noodles, duha (2) ka de-lata nga tuna, duha (2) ka de-lata nga karne, ug usa (1) ka botelya sa unom (6) ka litrong distilled drinking water.

Matod ni PAGCOR Davao Branch Manager Antonio V. Covarrubias, ang pagtunol sa maong mga relief packs ug ang paghatag og tabang sa mga nanginahanglan dili inisyatibo kundili responsibilidad nila isip mga trabahante sa serbisyo publiko.

“This is part of our social responsibility project sa in times of calamities. Actually, this is held dili lang diri sa Mindanao but all over the Philippines. So, PAGCOR is active sa mga outreach activity for all calamities and extending assistance to the needy”, ingon ni Covarrubias.

Dugang pa sa Branch Manager nga kaakohan gayud sa ilang korporasyon nga makapatungha og pundo para sa mga sosyo-sibiko nga mga proyekto subay sa mga kalihokan sa panggamhanan.

“Naingon nako as part of our social responsibility program, PAGCOR is mandated to generate funds for the government especially for the socio-civic projects and the social fund of the President. So, in addition to that, we also conduct eto yung mga outreach programs, relief operations like this to parang extension na rin ng help as a government, its service in government”, sulti ni Covarrubias.

Nalipay usab nga makigtambayayong sa PAGCOR ang PAF Wing Eastern Mindanao Tactical Operations Group 11 (TOG 11) pinaagi sa pagtabang sa transportasyon sa mga relief packs gikan sa Manila paingon sa Davao, nagpahayag nga ang ilang ahensya makanunayon nga nagasuporta og humanitarian efforts sama niini ilabi na panahon sa kalamidad.

Samtang mipaabot sa iyang hingpit nga pasalamat si Davao del Norte Provincial Administrator Josie Jean Rabanoz ngadto sa PAGCOR sa mga gidonar niini nga food packs alang sa mga naapektuhan sa pagbaha.

“On behalf of Kuya Gov Edwin I. Jubahib, we would like to thank PAGCOR for donating 200 packs of kaning mga relief goods… dako kaayo siya’g tabang diri sa atoang mga katawhan sa Davao del Norte labi pa kay nakasinati ta og baha kagahapon ug adtong mga past days. Murag twice na ta naagian og baha. So, pasalamat ta sa’tong mga partners kay hing-extend sila og assistance ug dako kaayo’g tabang ni para sa’tong mga katawhan”, pasalamat ni Rabanoz.

Gihisgotan sab sa Provincial Administrator kon giunsa nga ang mga programa sa kasamtangang administrasyon sama sa ‘Oplan Canal Program’ nakatampo sa pagkontrolar ug pagpamenos sa baha sa probinsya.

“Pasalamat lang ta nga at least ang baha nato karon dili na pareha kaniadto nga mu-last for how many days. Karon, hours lang. Within 24 hours, mag-subside na ang tubig, which is very very thankful ta kay pasabot nga nag-effect ang kadtong program nga gihimo ni Kuya Gov Edwin tong Oplan Kanal ug kadtong dredging sa atoang main rivers… Ang atong kalipay nga kadtong pagtinabangay sa mga LGUs nato sa atong Oplan Canal dako og effect, dako og impact sa pag-control ug sa pag-mitigate sa atoang baha diri sa tibuok probinsya sa Davao del Norte”, butyag ni Rabanoz.

Gipahibalo usab ni Rabanoz nga hangtod karon nagdawatan gihapon ang probinsya sa tanang matang sa donasyon ug hinabang.