Paspas nga pagtunol sa ayuda ang gihimo sa Probinsyal nga Panggamhanan sa Davao del Norte ubos sa liderato ni Governor Edwin “Kuya Gov” Jubahib ngadto sa dul-an 1,500 ka mga residente nga biktima sa baha sa lungsod sa B.E. Dujali, Sto. Tomas, ug New Corella sugod niadtong Agosto 23 hangtud 25, 2023.

Sumala ni PSWDO Asst. Head Jeffrey Calamongay nga maoy nanguna sa relief distribution nga gimandoan sila ni Kuya Gov nga ihatud gayud sa labing daling panahon ang maong mga relief goods aron adunay hinanaling magamit ang mga nabiktima sa pagbaha.

Giawhag sab ni Calamongay ang mga katawhan sa pag-amping sa kinaiyahan ug sa pagpananom og mga kahoy aron makunhoran ang epekto sa climate change.

“Ang PSWDO ug ang Provincial Government nihatag og gamay’ng tabang para sa nabahaan. Dili man ingon nga nalipay ta kay nakadawat ta’g bugas. Kinsa may malipay dinhi nga magsige ta’g kabahaan? Ato gyung iampo, atong panalipdan, ug alagaon ang atong kinaiyahan nga dili ta maigo sa sakuna,” ingon ni Calamongay.

Nagpaabot sa ilang pasalamat kang gobernador ang mga nidawat sa maong ayuda. Sumala nila nga dako kaayong tabang alang sa ilang mga pamilya ang mga hinabang nga gilangkoban sa lima (5) ka kilong bugas ug mga delata.

“Daghan kaayong salamat Gov sa imong hinabang sa amoa. Bisan kani lang ang amoang nadawat apan dako kaayo ang pagpasalamat namo nga mga miyembro sa District 3 nga nakaangkon og kalamidad. So, daghan kaayong salamat,” butyag ni Billy Ligan, usa sa mga nabahaan.

“Sa giabot namo ron nga naay gipanghatag diri, pasalamat ko kang Kuya Gov. Daghan kaayo’g salamat Kuya Gov nga nakatabang ka diri sa nabahaan,” sulti ni Merlyn Parawan.

Sa dul-an 1,500 nga nabahaan, 689 ka food packs ang nadawat sa mga residente sa B.E. Dujali, 542 sa Mesaoy, New Corella, ug 230 sa Bobongon, Sto. Tomas.

Writer/Photos: Nestor Mata, Jr.