“Ihatag ang maayong kaugmaon alang sa mga kabataang nahisalaag ug nakahimo’g salaud.” Kini ang nahimong pamahayag ni Governor Edwin “Kuya Gov” Jubahib atol sa ika-9 nga anibersaryo sa katukoran sa Bahay Pag-asa sa Poblacion, New Corella, Davao del Norte, niadtong Septyembre 1, 2023.
“Kaming tanan dinhi intrumento lang para sa bag-ong pag-asa sa maong mga bata. Mao ning gitawag nato’g bahay pag-asa, kay kining maong institusyon sa atong gobyerno maoy nag-challenge sa atong mga kabataan nga ma-reform o hatagan sila’g kausaban kung unsa man tong anaa sa ilang mga hunahuna nganong nahisalaag sila,” ingon ni Kuya Gov.
Giawhag sa gobernador ang mga ginikanan sa mga kabataan nga amumahon nila ang ilang mga anak ug bantayan aron magbag-o na kini ug dili na makahimo og mga kalapasan sa balaud. Gihangyo sab ni Kuya Gov ang mga kabataan nga residente sa maong pasilidad nga likayan na ang paghimo’g sala.
Gipahimangnoan ni Executive Judge Jimmy B. Buco ang mga ginikanan nga ilang atimanon ang ilang mga anak aron dili na kini makahimo’g krimen. Dugang niya nga kawang lamang ang mga pagpaningkamot sa mga ginikanan kung ilang mapasagdan ang ilang mga anak ug mahitumpawak sa kadautan.
“Ang handom namo sa gobyerno man gyud nga ang atong mga kabataan nga mabitbit nato dinhi sa sulod, nga inig gawas andam na ug mahimong responsable nga mga kabataan dinha sa inyong mga panimalay. Until then, your obligation as parents to your children never cease the moment they are brought to the center. You still are their parents. Kamo gihapon ang ilang mga ginikanan,” sulti ni Judge Buco.
Gisaysay ni Provincial Social Welfare and Development Officer Rosalinda O. Rapista, RSW, MPA, nga mokabat na sa 182 ka mga kabataang naay kaso ang nasulod sa maong pasilidad samtang 120 ang nahatagan na’g intervention. Dugang ni Rapista nga adunay mga kabataan ang naka-avail sa full scholarship program ni Kuya Gov, diin aduna kini libreng sakyanan, hatud-sundo sa ilang tulonghaan.
Atol sa maong kasaulogan, gihataga’g mga pasidungog ang nagkadaiyang ahensiya sa gobyerno ug Local Government Unit (LGU) nga adunay dakong natabang sa kalampusan sa Bahay Pag-asa.
Nitambong sa maong kalihokan ang mga pangulo sa departamento sa kapitolyo nga gipangunahan ni Provincial Administrator Engr. Josie Jean Rabanoz, mga personahe sa nagkadaiyang LGUs ug mga personahe gikan sa hudikatora.
Ang Bahay Pag-asa gitukod aron mahimong santuwaryo sa paglaom alang sa mga kabataang nahisalaag, mahatagan kini’g interbensyon, rehabilitasyon ug reintegrasyon kalakip sab ang paghatag kaalam sa nagkadaiyang trabaho nga magamit sa mga kabataan.
Writer: Nestor Mata, Jr.
