Ang matag-usa kanato kabahin sa pagpanday ug sa pagpatunhay sa kalinaw, ug wala kini gisangon sa pipila lamang.
Kini ang gihatagan og gibug-aton nila Governor Edwin "Kuya Gov" Jubahib ug uban pang tinahod nga mga mamumulong sa seremonyas sa programa, atol sa pag-host sa probinsya sa Davao del Norte sa National Peace Consciousness Month celebration niadtong Septyembre 11, 2023.
“Every Filipino… regardless of culture, belief and ideology, has a key role to play in the peacebuilding process,” sulti sa gobernador, sa gipahigayon nga programa sulod sa Peace Village Exhibit sa Atrium sa SM City Davao, Ecoland, Davao City.
Gibida ni Kuya Gov ang maayong panggobyerno nga nahimong susi sa kalampusan sa Davao del Norte sa pagsustenir sa kalinaw usa ka tuig human kini madeklara nga “insurgency-free”, sanglit wala nay natalang recruitment ug pagpanghasi ang mga elemento sa New People’s Army sa probinsya.
Sa mensahe ni Eastern Mindanao Command Commander LtGen. Greg Almerol, nga gibasa ni Deputy Commander BGen. Consolito P. Yecla, gibatbat niya ang kamahinungdanon sa diwa sa pagpasig-uli ug panaghiusa ug sa pagsiguro nga ang benepisyo sa kalinaw dapat matagamtaman sa tanan.
Dili sayon ang pagsustenir sa kalinaw apan kaya kini kung ang matag-usa motuman sa ilang responsibilidad sa pagpatunhay niini, sumala sa mensahe nila 10th ID Commander Major General Jose Eriel Niembra, nga gibasa ni 1003rd IB Commander Col. Marione Angcao, ug sa mensahe usab ni Area Police Command-Eastern Mindanao Commander PLt. Gen. Filmore B. Escobal, nga gibasa ni Command Executive Officer PCol. Ramil R. Montilla.
Una nang giablihan buntag nianang adlawa ni Vice President Sara Duterte ang maong Peace Village Exhibit, isip pag-obserbar sa Davao Region sa National Peace Consciousness Month.
Kauban sa bise presidente sila Presidential Assistant for Eastern Mindanao (OPAMINE) Secretary Leo Tereso Magno, OPAPRU Eastern Mindanao Director Atty. Elisa Evangelista-Lapiña, Foreign Affairs Assistant Secretary Renato Pedro Villa, Kuya Gov, SM Assistant Vice-President for Operations Engr. Jonathan Nick Santos, ug uban pang mga dignitaryo.
Ang Peace Month base sa Proclamation No. 675 sa tuig 2004, nga nagtumong sa pagsilsil sa mas dako nga kahibalo ug pagsabot sa katawhan alang sa pagsulong sa kultura sa kalinaw sa nasud.
Writer: Noel Baguio
