Gibida ang mga produkto sa mga kababainhan sa Provincial Rural Improvement Club, Achievement Day 2023 nga gipahigayon sa DavNor Gym niadtong Septyembre 19, 2023.
Kini nga selebrasyon adunay temang “Kababayen-an: Kahayag sa Panimalay, Katambayayong sa Mauswagong Pagpanguma ug Panginabuhian", diin adunay panagtigi sa nagkadaiyang kompetisyon sama sa RIC talent show 2023, product display, cooking contest ug ang RIC gardening contest. Niangkon sa 1st place sa gardening ang RIC Samal City, 2nd place ang Panabo City, ug 3rd place ang Tagum City. Gi-display ang mga produktong ginama sa mga miyembro niini sama sa dishwashing liquid, mga banig, IP accessories, processed food, mga produktong pang-agrikultura ug uban pa. Gidawat sa mga RIC winners ang cash prize, plaque, ug certification. Ang kalihokan gipartisiparan sa tanang miyembro sa RIC sa tibuok probinsya sa pagpanguna ni RIC Provincial President Eva Estabillo uban sa pakigduyog sa Provincial Agriculturist Office (PAGRO), ug mga representante sa nagkadaiyang ahensiya.
Sa gipadangat nga mensahe ni Governor Edwin "Kuya Gov" Jubahib pinaagi sa iyang representante, gisaysay niini ang mainitong suporta sa gobernador sa mga programang panginabuhian sa mga kababaihan.
“As your Governor Kuya Gov, I am proud to stand with you in celebrating these achievements. Your dedication to creating brighter and more inclusive homes, communities and livelihoods is a testament to the strength of unity and shared purpose as a club,” sumala ni Kuya Gov pinaagi ni Lemuel Puerto.
Emosyonal usab ang gipalanog nga mensahe ni Board Member Prospero "Popo" Estabillo, Jr. sa tanang miyembro gumikan kay sa hataas nga katuigan nga ubos sa pagdumala sa iyang inahan ang RIC nagpabilin kining nibarog ug mas nilig-on pa niining higayona gumikan sa suporta usab nila ni Kuya Gov Jubahib, Congressman Pantaleon Alvarez, ug mga nasudnong ahensiya sama sa DSWD, DTI, DOST, DOLE ug uban pa.
"𝘗𝘢𝘭𝘢𝘬𝘱𝘢𝘬𝘢𝘯 𝘯𝘢𝘵𝘰 𝘴𝘪 𝘒𝘶𝘺𝘢 𝘎𝘰𝘷, 𝘱𝘢𝘭𝘢𝘬𝘱𝘢𝘬𝘢𝘯 𝘯𝘢𝘵𝘰 𝘚𝘪 𝘊𝘰𝘯𝘨. 𝘈𝘭𝘷𝘢𝘳𝘦𝘻, 𝘱𝘢𝘭𝘢𝘬𝘱𝘢𝘬𝘢𝘯 𝘯𝘢𝘵𝘰 𝘢𝘯𝘨 𝘮𝘨𝘢 𝘢𝘩𝘦𝘯𝘴𝘪𝘺𝘢 𝘴𝘢 𝘨𝘰𝘣𝘺𝘦𝘳𝘯𝘰, 𝘥𝘪𝘪𝘯 𝘯𝘢𝘩𝘪𝘮𝘰𝘯𝘨 𝘪𝘯𝘴𝘵𝘳𝘶𝘮𝘦𝘯𝘵𝘰 𝘯𝘨𝘢 𝘢𝘯𝘢𝘢 𝘱𝘢 𝘢𝘯𝘨 𝘙𝘐𝘊 𝘬𝘢𝘳𝘰𝘯, 𝘶𝘨 𝘭𝘢𝘣𝘢𝘸 𝘴𝘢 𝘵𝘢𝘯𝘢𝘯 𝘬𝘢𝘮𝘰𝘯𝘨 𝘮𝘢𝘵𝘢𝘨 𝘶𝘴𝘢 𝘬𝘢𝘯𝘪𝘯𝘺𝘰 𝘯𝘨𝘢 𝘮𝘨𝘢 𝘮𝘪𝘺𝘦𝘮𝘣𝘳𝘰 𝘴𝘢 𝘙𝘐𝘊 𝘤𝘰𝘯𝘨𝘳𝘢𝘵𝘶𝘭𝘢𝘵𝘪𝘰𝘯𝘴," matud ni BM Estabillo.
Write/Photo: Maria Lorna P. Tripoli
