Pahugtan o lig-onon ang kampanya sa pagdonar og dugo sa matag pamilya alang sa pagsalbar og kinabuhi sa panahon sa emerhensiya. Kini ang pag-awhag ni Director Annabelle Yumang, Department of Health (DOH) Region XI ngadto sa gatosan ka mga government nurses nga mga partisipante sa Davao Region First Conference cum Training Workshop, Septyembre 22, 2023 nga gipahinabo sa Arriesgado gym, siyudad sa Tagum.
Si Yumang ang pinasidunggang dinapit ug mamumulong sa panagtigom sa mga nurses nga nagikan sa mga probinsya sama sa Davao del Norte, Davao de Oro, Davao Oriental ug uban pang probinsya sakop sa rehiyon. Butyag ni Yumang nga sentro sa hisgtonan sa maong workshop ang nakakuha’g mga donors sa dugo gikan sa komunidad dili lamang panahon sa pandemya kondili sa tanang higayon, subay sa National Voluntary Blood Services Program. Kini nga kampanya gihimo alang sa dugang pondong dugo gumikan sa kadaghang nanginahanglan niini. Iya usab giawhag nga gikinahanglang i-upgrade ang mga barangay health stations nga dili dapat isagol sulod mismo sa mga barangay hall. Human kini nasayran sa naasoyng direktor nga adunay probinsya wala pa naka pa-upgrade sa pipila nila ka mga pasilidad.
Ang National Secretary sa NLPGN nga si Ms. Lucita Tagudin nagpasabot usab sa kamahinungdanon sa maong panagtigom ubos sa pagpasiugda sa National League of Philippine Government Nurses, Inc. - Davao Chapter. Duyog niya sila si Ms. Glorideta Oclarit, ang NLPGN Regional Officer-in-Charge, Ms. Mercy Dela Cruz, ang NLPGN President - Davao del Norte Chapter ug uban pa.
"Ang training workshop is for National Voluntary Blood Services Program. Of course, this is to strengthen the implementation of a National Voluntary Blood Services Program because we all know this program is very much important for the people especially those who need blood between life and death," sulti ni Tagudin.
Samtang sa Davao del Norte hugtanon ang suporta ni Governor Edwin "Kuya Gov" Jubahib pinaagi sa paghitsas sa mga pasilidad sama sa Carmen District Hospital, katukoran sa mga Rural Infirmary Hospital sa nagkadaiyang lokalidad, ug ang pagdestino sa mga nurses ngadto sa mga kabarangayan. Kini alang sa katumanan sa adbokasiya sa gobernador nga, "No one left behind" nga tanan makatagamtam sa serbisyo sa panggamhanan.
Writer/Photo: Maria Lorna P. Tripoli
