Butangan og P5 million budget ni Davao del Norte Acting Governor De Carlo “Oyo” Uy ang Davao del Norte Kapalong Zone Hospital, human siya nakasungkit og pondo gikan sa Department of Health. Kini ang iyang gibutyag atol sa iyang gihimong pagbisita sa maong balay-tambalan nga nahimutang sa Maniki, Kapalong, Davao del Norte, niadtong Abril 19, 2024.
Gihataga’g dakong importansya sa batan-ong gobernador ang kamahinungdanon sa maong ospital nga makaserbisyo sa bagang duot sa katawhan dinhi sa probinsya, ilabi na panahon sa emerhensiya.
“Karong adlawa nakipag-istorya ta kay Chief of Hospital nato kay nakasungkit ta og pondo sa national government pinaagi sa Medical Assistance for Indigents and Financially Incapacitated Patients. Mo-download ‘ta diri karon og initial nga P5 million. Mag-MOA lang with Department of Health para isa na ‘ni ka pamaagi nga atoang mahatagan og alibyo ang mga balayronon sa atoang mga pasyente,” sulti ni A-Gov. Uy.
Dugang ni Acting Governor Uy nga iyang dugangan ang pondo sa ospital aron dili magkulang ang mga tambal ug mahatagan gilayon ang mga pasyente sa ilang gikinahanglang medisina.
“Atoa pong gidungagan ug gisiguro nato ang drugs and medicines, meaning ang mga medisina diri sa atoang hospital na dapat bastante, kompleto, kay para ang atoang mga pasyente kung masakit sila, pag-once na pag-issue sa resita naa na dayon ang tambal, ready diri sa atong hospital,” matud sa acting governor.
Nipadangat sa iyang suporta ngadto kang Acting Governor Uy si Acting Vice Governor Flopone Royle Catalan. Iyang pagatutokan ang pagpalambo sa imprastraktura sa ospital, pagdunga’g medisina, kalakip sab ang pagdugang sa meal allowance sa mga pasyente. Dugang ni Catalan nga magapadayon ang Sangguniang Panlalawigan sa paghimo sa gikinahanglang balaodnon nga magamit alang sa dugang kalamboan sa probinsya.
“Nakita nato ang mga panginahanglanon in terms of infrastructure number 1, ug ang ikaduha ang atoang panginahanglanon sa medisina ug pondo dugang para sa ilahang meals sa atoang mga pasyente dinhi. Ang panggamhanan sa probinsya padayon, business as usual ta. Nagpadayon ang Sangguniang Panlalawigan, ang Legislative Department sa amoang trabaho, isip acting vice governor, isiguro gyud na nako nga padayon ang trabaho, paspas ang trabaho sa sanggunian para maapas pud ang mga panginahanglanon sa ehekutibo nga karon gidumalaan sa atoang Acting Governor De Carlo “Oyo” Uy,” saysay ni Acting Vice Gov. Catalan.
Nagkahiusa ang duha ka mga dagkong opisyal sa probinsya nga mapakusgan ug mapalambo ang paghatag sa serbisyong medikal dili lamang sa mga district hospitals nga gidumala sa probinsya kalakip sab ang paghatag financial assistance sa mga pasyente nga naadmit sa mga pribadong balay-tambalanan.
Writer/Photos: Nestor Mata, Jr.
