Karon ang unang adlaw sa Pag-file sa Certificate of Candidacy (COC) alang sa 2022 nasyonal ug lokal nga piniliay sa nasud.

Sa Commission on Election Provincial Office sa Davao del Norte, kamatikdan ang kamingaw sa venue nga nahimutang sa Clubhouse, Sports Complex, Mankilam, Tagum City bisan pa man plastar na ang covid-19 compliant nga lugar ug andam na ang mga Comelec staff sa pagdawat sa mga kandidato.

Limitado ang makasulod sa venue. Dunay designated area ang gimontar alang sa mga escorts, watchers ug sector sa media aron malikayan ang kayagaw ug masiguro ang siguridad sa mga kandidato.

Alerto usab ang kapulisan gikan sa Davao del Norte Provincial Police Office alang sa pagmintinar sa kalinaw ug kahapsay samtang nagapadayon ang kalihokan.

Aron walay problema sa pagsumite sa statistical report ug listahan sa mga nag-file, gisiguro usab sa ahensiya ang kusog nga koneksyon sa internet.

Hangtod alas-4 karong hapon, wala pay maski usa ka kandidato alang sa probinsyal ug kongresyonal nga mga posisyon ang misumiter sa ilang kandidatora.

Apan duna nay nag-file didto sa Islang Siyudad sa Samal alang sa pagka-Mayor ganinang alas-10 sa buntag nga mao si SP Member Helen Perez, ang kasamtangang ABC President sa maong lungsod.

Matud ni Ms. Christina Marañan, Comelec Provincial Office Receiving Committee, nga gidahum na nila nga walay mag-file karong adlawa pareho sa nangaging filing. Ang ubang mga kandidato nagpahibalo na'ng daan kung kanus-a sila magsumite sama nila Gobernador Edwin "Kuya Gob" Jubahib, nga gilaumang mag-file ugmang adlawa pagkahuman sa misa nga iyang tambongan; sa Lunes, Oktubre 4, si 1st District Congressman Pantaleon "Bebot" Alvarez; ug ang mga miyembro sa partidong Hugpong ng Pagbabago (HNP) karong Miyerkules, Oktubre 6.

Nakatakda sa Oktubre 1-8, 2021 ang pagdawat sa COC. Abli ang ilang buhatan alas-8 sa buntag hangtod alas-5 sa hapon. (Jun Rey Villanueva, PICKMO)