Misumite na sa ilang kandidatura alang sa ikaduhang termino ang kampo ni incumbent Mayor Jonnie A. Libayao kauban iyang bise-mayor, Hon. Francisco G. Gipulla Jr. niadtong Oktubre 3, Dominggo sa buntag.
Ilalom sa susamang partido sila Sangguniang Bayan Members Gerardi L. Colobong, Salvador T. Nepa, Jimboy D. Acao, Rolando C. Piquero ug Sylveth S. Gaila. Mikompleto usab sa han-ay sila Joel L. Cabajar ug Noel C. Bonggot sa opisyal nga mga kandidato sa Munisipyo sa Talaingod alang sa 2022 Local and National Election. Ang maong kampo nahisakop sa Partido Reporma kinsang Secretary-General mao si Gobernador Edwin “Kuya Gob” Jubahib.
Nakita ni Mayor Jonnie ang panginahanglanon sa pagpadayon sa mga nasugdang mga programa nga dako ang epekto sa kalamboan sa Talaingod ug sa mga lumolupyo niini. Hinungdang midesider kini nga magpapili pag-usab sa umalabot nga eleksiyon.
Nanghinaot usab siya nga sa hiniusang tabang sa panggamhanan sa Davao del Norte ug lokal nga panggamhanan sa Munisipyo sa Talaingod, mas mapalig-on pa ang kalinaw ug kahapsay sa maong lungsod ug mas matabangan pa nga mapalambo ang lebel sa pagkinabuhi sa iyang ginsakopan.
