BISAN sa kalayo giabot gayod sa KAwsa sa AGrikulturA ug PAnginabuhian sa barangaY (KAAGAPAY) ang talagsa ra maabot lagyo nga mga sitios (sub-village) sa Talaingod, Davao del Norte.
Pinaagi sa mga Liaiason Officers (LOs) ug mga KAAGAPAY staff, ang teknolohiya sa pagtanom uban sa mga seedlings sa gulay miabot bisan sa Sitio Km 31 ug Tibucag, mga suok nga sitio sa barangay Palma Gil. Molungtad og 3.5 ngadto sa 4 ka oras ang pagbiyahe gikan sa Tagum City diha sa lubak-lubak nga dalan.
Alang sa Sitio Tibucag, Purok 13 si Analyn Anlas, ang presidente sa IP Women’s Organization ang mipahayag sa ilang kinasingkasing nga pagpasalamat sa programang KAAGAPAY.
“Dako kaayo mi’g pasalamat kay nakatabang sa amoa; sa amoa kababayen-an naa na mi matarbaho makatabang mi sa among mga bana. . Gitagaan mi ni Governor og manok aron ipabuhi sa amoa mga kababayen-an. . . nagtanom pod,” pahayag ni Analyn human nga ilang nadawat ang TUlong PAngkabuhayan for Displaced/Disadvantage Workers (TUPAD) payout nga P3,960 sa ilang pagtrabaho sa kulongan sa manok.
Kahinumduman nga balik niadtong Hunyo 2020, gilunsad ni Gobernador Edwin “Kuya Gob” Jubahib ang food-sufficiency program nga KAAGAPAY sa tuyo nga dili kaayo maglisod ang Davao del Norte labot sa suplay sa pagkaon gumikan sa pagsige og lockdown tungod sa COVID-19. Giawhag niini ang katawhan nga magtanom og gulay (seedlings libre) ug ang pagbuhi og free-range dagko nga manok (piso libre) aron makatabang sa ilahang ekonomiya.
“Dako kaayo mi’g pagpasalamat kay Governor ilabina sa paghatag kanamo sa KAAGAPAY; unang-una ang asosasyon gihatagan niya og manokan ug tindahan ug ang organisasyon nga gihatag sa Sitio Tibucag Purok 13,” padayong nagpasalamat si Analyn.
Alang sa usa ka IP nga amahan, ang TUPAD payout “makaluwas” na sa pipila ka higayon sa tingkaon.
“Dagko’g tabang sa pamilya. . Pangpalit og bugas, sud-an,” matod ni Ranilo, Jr.
Usa si Angelicka Mancilla sa mga KAAGAPAY staff nga nag-monitor sa iyang ka-tribu nga nagpadagko sa mga manok.
“Ginaatiman jud nila ang manok, ginapainom og antibiotic, ginapainom og vitamins . . Walay sapayan sa amoa kay tungod nagtrabaho mi,” pahayag ni Angelicka nga masaligon sa mga babayeng miembro sa Sitio Tibucag Women’s Organization.
Hangtod ning pagsulat sobra na P30 milyones ang “nasungkit” nga pondo ni Gobernador Jubahib gikan sa Department of Labor and Employment (DOLE) aron pondohan ang KAAGAPAY program diin ang mga benepisyaryo sakop sa informal sector ug mga gagmay’ng mag-uuma nga apektado kaayo sa COVID-19 pandemya.
