Malipayong midawat sa GANTIMPALA AGAD Awards gikan kang Gobernador Edwin “Kuya Gob” I. Jubahib ang 44 ka mga personahe sa nagkalain-laing opisina sa Provincial Capitol sa Davao del Norte kagahapong adlawa, Oktubre 11, 2021.
Pinaagi sa Provincial Human Resource Management Office (PHRMO) nga gipangunahan ni Edwin A. Palero, personal nga gitunol kanila ang Certificate of Recognition ug tokens isip pasidungog. Gilangkuban sa lima (5) ka mga personahe gikan sa Provincial Administrator's Office (PADO), upat (4) sa Provincial Accountant's Office (PACCO), duha (2) sa Provincial Treasurer's Office (PTO), tag-usa gikan sa Provincial Budget Office (PBO), PHRMO, Provincial Legal Office (PLO), Provincial Environment and Natural Resources Office (PENRO) ug Provincial Agriculturist's Office (PAGRO), 14 gikan sa Provincial Engineer's Office (PEO), upat (4) sa Provincial General Services Office (PGSO) ug 11 gikan sa Provincial Planning and Development Office (PPDO) ang awardees.
Ang Probinsya sa Davao del Norte giila sa Department of the Interior and Local Government (DILG) nga mao ang pinakauna nga nagsumite sa Local Road Network Development Plan (LRNDP) sa tibuok Rehiyon XI. Maoy hinungdan nga naikag si Kuya Gob sa paghatag og pasidungog sa hiniusang paningkamot ug dedikasyon sa mga indibidwal gikan sa mga nasangpit nga opisina sa probinsya.
Nagpadayag ang mga awardees sa ilang dakong pasalamat kay Kuya Gob sa paghatag og bili sa ilang paningkamot alang sa kaayohan sa katawhan sa Davao del Norte ug sa PHRMO nga maoy naglihok sa pagtunol sa ilang awards.
Mapasalamaton usab nga midawat og dugang pasidungog ang PACCO gikan sa Commission on Audit sa Rehiyon-XI pinaagi kang Davao del Norte Provincial Accountant Winona J. Avenido tungod sa pagsumite sa CY 2020 Year-End Financial Statements, sayo sa gilauman niadtong Pebrero 16 niining tuiga luyo sa pandemya. Dakong tabang alang sa COA ang sayo nga pagpasa sa mga dokumento alang sa mas hapsay nga pagsusi ug pag-analisar sa mga abot sa probinsya.
Nag-awhag si PHRMO Supervising Administrative Officer Michelle Claridad sa tanang department heads sa kapitolyo nga dili magpanuko sa pagpasa og mga pangalan sa mga personahe nga dunay maayong nabuhat nga angay pasidunggan sa ilang opisina isip paghatag og importansya sa ilang kahago ug pagpaningkamot.
Writer: Dezza Lee Manato
Cameraman: Ryan Omila & PHRMO staff
